ឯកឧត្តមបណ្ឌិតសភាចារ្យ ហង់ជួន ណារ៉ុន អញ្ជើញជាអធិបតីក្នុងពិធីបិទវេទិកាអន្តរជាតិស្តីពីការអប់រំគ្រូបង្រៀនសតវត្សរ៍ទី២១លើកទី១ នៅវិទ្យាស្ថានគរុកោសល្យបាត់ដំបង

បាត់ដំបង៖នៅថ្ងៃទី១៩ ខែតុលា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានអញ្ជើញជាអធិបតីក្នុងពិធីបិទវេទិកាអន្តរជាតិស្តីពីការអប់រំគ្រូបង្រៀនសតវត្សរ៍ទី២១ លើកទី១ ព្រមទាំងពិព័រណ៍ស្ទែម និងពិព័រណ៍សៀវភៅដែលរៀបចំដោយវិទ្យាស្ថានគរុកោសល្យបាត់ដំបង។
វេទិកានេះប្រព្រឹត្តទៅក្រោមប្រធានបទ «ការអប់រំគ្រូបង្រៀនតាមគន្លងអប់រំថ្មី៖ ពីគ្រឹះអំណាន និងគណិតវិទ្យាដំបូង ទៅនវានុវត្តន៍ស្ទែម ប្រកបដោយបរិយាបន្ន និងភាពធន់» ដោយមានការចូលរួមពីថ្នាក់ដឹកនាំក្រសួង ដៃគូអភិវឌ្ឍន៍ជាតិ និងអន្តរជាតិ អ្នកជំនាញ អ្នកស្រាវជ្រាវ គ្រូឧទ្ទេស និងគរុនិស្សិតក្នុងគោលបំណងសំខាន់គឺលើកកម្ពស់គុណភាពបណ្តុះបណ្តាលគ្រូ ចែករំលែកចំណេះដឹង និងលទ្ធផលស្រាវជ្រាវ ព្រមទាំងជំរុញនវានុវត្តន៍គរុកោសល្យឱ្យឆ្លើយតបទៅនឹងតម្រូវការអប់រំសតវត្សរ៍ទី២១។ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានលើកឡើងពីសកម្មភាពសំខាន់ៗក្នុងវេទិការួមមានសម័យប្រជុំស្របគ្នាសម្រាប់បទបង្ហាញសង្ខេបអត្ថបទស្រាវជ្រាវចំនួន៣៤វគ្គ បទបង្ហាញគន្លឹះចំនួន៣ បទបង្ហាញដោយអ្នកជំនាញចំនួន៦ និងកិច្ចពិភាក្សាតុមូលចំនួន១វគ្គ។ សកម្មភាពទាំងនេះផ្តោតលើការអប់រំតាមគន្លងថ្មី ការពង្រឹងអំណាន និងគណិតវិទ្យាដំបូង និងការប្រើប្រាស់បច្ចេកវិទ្យាអប់រំ។ពិព័រណ៍ស្ទែមត្រូវបានរៀបចំជា៦ភូមិពិព័រណ៍ ដោយមានបង្ហាញស្នាដៃច្នៃប្រឌិត និងការអនុវត្តវិធីសាស្ត្របង្រៀនថ្មីៗ។ជាមួយគ្នានេះពិព័រណ៍សៀវភៅមានប្រមាណ២២ស្តង់ ដោយមានការចូលរួមពីគ្រឹះស្ថានអប់រំ អង្គការ គ្រឹះស្ថានបោះពុម្ពផ្សាយ និងដៃគូពាក់ព័ន្ធ ក្នុងគោលដៅលើកកម្ពស់វប្បធម៌អាន ការស្រាវជ្រាវ ការនិពន្ធ និងការសិក្សាពេញមួយជីវិត។
ឯកឧត្តមបណ្ឌិត ជា រដ្ឋា សង្កត់ធ្ងន់ថា ជាទិសដៅបន្ត វិទ្យាស្ថានគរុកោសល្យបាត់ដំបងប្តេជ្ញាពង្រឹងការស្រាវជ្រាវនវានុវត្តន៍ឌីជីថលនិងវិធីសាស្ត្របង្រៀនថ្មីៗដើម្បីឆ្ពោះទៅជាមជ្ឈមណ្ឌលឧត្តមភាពនៃការបណ្តុះបណ្តាលគ្រូបង្រៀនសតវត្សរ៍ទី២១។
ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ចំពោះការខិតខំរបស់គណៈគ្រប់គ្រង គ្រូឧទ្ទេស គរុនិស្សិត និងដៃគូអភិវឌ្ឍន៍។ ឯកឧត្តមបានគូសបញ្ជាក់ថា គ្រូបង្រៀនជាកត្តាសំខាន់នៃកំណែទម្រង់អប់រំ និងការអភិវឌ្ឍធនធានមនុស្ស។ការពង្រឹងសមត្ថភាពគ្រូត្រូវភ្ជាប់ការបណ្តុះបណ្តាលនឹងការអនុវត្តក្នុងថ្នាក់រៀន ដោយផ្តោតលើអំណាន និងគណិតវិទ្យាដំបូង ការអភិវឌ្ឍវិជ្ជាជីវៈជាប្រចាំ និងការប្រើប្រាស់បច្ចេកវិទ្យាឱ្យមានប្រសិទ្ធភាព។
ឯកឧត្តមបានលើកឡើងអំពីការអភិវឌ្ឍគ្រូបង្រៀន និងស្តង់ដាវិជ្ជាជីវៈគ្រូបង្រៀនទាក់ទងនឹងបញ្ហាប្រឈម-ដំណោះស្រាយ,បញ្ហាសង្គ្រាម និងការវិវត្តគ្រូបង្រៀន,ភាពខុសគ្នារវាងគ្រូបង្រៀននិងការប្រើប្រាស់បច្ចេកវិទ្យា និងស្តង់ដាគ្រូបង្រៀនសតវត្សទី២១ដែលលោកគ្រូអ្នកគ្រូត្រូវតែមានគឺចំណេះដឹងវិជ្ជាជីវៈ ប្រតិបត្តិវិជ្ជាជីវៈ  សិក្សាវិជ្ជាជីវៈ និងសីលធម៌វិជ្ជាជីវៈជាគ្រូបង្រៀន។ឯកឧត្តម បានសង្កត់ធ្ងន់លើកិច្ចសហប្រតិបត្តិការអន្តរជាតិដើម្បីផ្លាស់ប្តូរចំណេះដឹង បទពិសោធន៍ និងការស្រាវជ្រាវសំដៅធ្វើឱ្យការអប់រំគ្រូបង្រៀនមានគុណភាព សមធម៌ និងបរិយាបន្ន៕

១៩ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia