B.T.E.C – Building up Teachers today for a better Education tomorrow in Cambodia

📅 កាលបរិច្ឆេទ: ថ្ងៃទី១០ ខែកក្កដា ឆ្នាំ២០២៥

🕗 ម៉ោង: ៨:០០ ព្រឹក ដល់ ៤:០០ ល្ងាច

📍 ទីតាំង: វិទ្យាស្ថានគរុកោសល្យបាត់ដំបង

💰 ចូលរួមដោយសេរី

នាព្រឹកថ្ងៃទី១៦ ខែមិថុនា ឆ្នាំ២០២៥ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានដឹកនាំក្រុមគណៈគ្រប់គ្រងវិទ្យាស្ថាន ដែលមាន លោកនាយករង លោកស្រីបណ្ឌិតនាយិការង ព្រឹទ្ធបុរស ព្រឹទ្ធបុរសរង និងប្រធានការិយាល័យ ដេប៉ាតឺម៉ង់ ប្រជុំពិនិត្យលើបំណែងចែកតួនាទីនិងភារកិច្ចរបស់មន្ត្រីចូលកាន់តំណែងថ្មីរបស់វិទ្យាស្ថាន។

ថ្ងៃចន្ទ ដើមសប្តាហ៍ ៦រោច ខែជេស្ឋ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៦ ខែមិថុនា ឆ្នាំ២០២៥ គណៈគ្រប់គ្រង គ្រូឧទ្ទេស បុគ្គលិកអប់រំ និងគរុនិស្សិត នៃវិទ្យាស្ថានគរុកោសល្យបាត់ដំបង បានគោរពទង់ជាតិនៃព្រះរាជាណាចក្រកម្ពុជា។

នាព្រឹកថ្ងៃអាទិត្យ ទី១៥ ខែមិថុនា ឆ្នាំ២០២៥ វិទ្យាស្ថានគរុកោសល្យបាត់ដំបង បានរៀបចំកម្មវិធីបើកវគ្គសិក្សាខ្លីស្តីពី “គរុកោសល្យ និងវិធីសាស្រ្តបង្រៀនក្នុងបែបថ្មី” (វគ្គទី៧) ក្រោមអធិបតីភាព ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង (វ.គ.ប) ដោយមានការអញ្ជើញចូលរួមពី លោកនាយករងវិទ្យាស្ថាន លោកព្រឹទ្ធបុរស លោកគ្រូ-អ្នកគ្រូឧទ្ទេស និងសិក្ខាកាមថ្នាក់សិក្សាផ្ទាល់ វេន សៅរ៍-អាទិត្យ ចំនួន៨៤នាក់។

នាព្រឹកថ្ងៃទី១៣ ខែមិថុនា ឆ្នាំ២០២៥ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងគណៈគ្រប់គ្រងវិទ្យាស្ថាន បានទទួលស្វាគមន៍ប្រតិភូមកពីសាកលវិទ្យាល័យបច្ចេកវិទ្យានិងវិទ្យាសាស្ត្រកម្ពុជា ដែលដឹកនាំដោយ ឯកឧត្តមសាស្ត្រាចារ្យបណ្ឌិត ឆែម គាតរិទ្ធី និងលោកសាស្ត្រាចារ្យបណ្ឌិត ឃៀង សុធី សាកលវិទ្យាធិការសាកលវិទ្យាល័យបច្ចេកវិទ្យានិងវិទ្យាសាស្ត្រកម្ពុជា ដើម្បីពិភាក្សាកិច្ចសហប្រតិបត្តិការណ៍រវាងស្ថាប័នទាំងពីរ នៅវិទ្យាស្ថានគរុកោសល្យបាត់ដំបង។

នារសៀលថ្ងៃពុធ ១រោច ខែជេស្ឋ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១១ ខែមិថុនា ឆ្នាំ២០២៥ វិទ្យាស្ថានគរុកោសល្យបាត់ដំបង តំណាងដោយ ឯកឧត្តមបណ្ឌិត ជា រដ្ឋា នាយកវិទ្យាស្ថាន និងអង្គការVVOB Cambodia តំណាងដោយលោក Mr. Roger Cabiles ប្រធានគ្រប់គ្រងកម្មវិធីនៃអង្គការVVOB ប្រចាំប្រទេសកម្ពុជា បានចុះហត្ថលេខាលើអនុស្សរណៈនៃការយោគយល់គ្នា ក្នុងគោលបំណង លើកកម្ពស់ការបណ្ដុះបណ្ដាល និងការធ្វើវិក្រឹតការគ្រូបង្រៀន ពង្រឹងការអភិវឌ្ឍសមត្ថភាពគ្រូបង្រៀន អភិវឌ្ឍសមត្ថភាពស្រាវជ្រាវដោយផ្អែកលើភស្តុតាងរបស់គ្រូបង្រៀន និងការផ្លាស់ប្តូរចំណេះដឹង ដើម្បីបង្កើនលទ្ធផលបង្រៀន និងរៀន។ បន្ថែមពីនេះ ក្នុងកិច្ចសំណេះសំណាល ឯកឧត្តមបណ្ឌិត បានសង្ខេបពីសកម្មភាពបណ្តុះបណ្តាលគ្រូ និងវគ្គសិក្សាគរុកោសល្យ និងវិធីសាស្ត្របង្រៀនដែលកំពុងដំណើរការ និងទទួលបានការចាប់អារម្មណ៍យ៉ាងខ្លាំងពីគ្រូបង្រៀនកិច្ចសន្យា និងសាធារណៈជនខាងក្រៅផងដែរ។ ដោយឡែកលោកប្រធានអង្គការVVOB បានបង្ហាញសេចក្តីពេញចិត្ត និងអរគុណដល់ ឯកឧត្តមបណ្ឌិត ជាពិសេសការសហការគាំទ្រយ៉ាងខ្លាំងលើសកម្មភាពកន្លងមកដែលបានធ្វើរួមគ្នា និងឈានដល់ការរៀបចំឱ្យមានកិច្ចសហប្រតិបត្តិការ (MoU) ដើម្បីបន្តនូវគោលដៅរួម ពោលគឺដើម្បីជាប្រយោជន៍ដល់ភាគីទាំងពីរតាមរយៈកិច្ចសហប្រតិបត្តិការនេះ។

រាជធានីភ្នំពេញ៖ នាព្រឹកថ្ងៃទី១០ ខែមិថុនា ឆ្នាំ២០២៥ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានចូលជាអធិបតី ក្នុងពិធីចុះអនុស្សរណៈយោគយល់គ្នា រវាង សាកលវិទ្យាល័យ Sahmyook នៃសាធារណរដ្ឋកូរ៉េ និងវិទ្យាស្ថានគរុកោសល្យបាត់ដំបង នៃព្រះរាជាណាចក្រកម្ពុជា ដោយមានការអញ្ជើញចូលរួមពីសំណាក់ លោកបណ្ឌិត HaeJong Je សាកលវិទ្យាធិការ នៃសាកលវិទ្យាល័យ Sahmyook, ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងភាគីពាក់ព័ន្ធមកពីអង្គភាពទាំងពីរជាច្រើនរូប។

នាព្រឹកថ្ងៃទី២០ ខែឧសភា ឆ្នាំ២០២៥ វិទ្យាស្ថានគរុកោសល្យបាត់ដំបងបានរៀបចំបាឋកថាគន្លឹះស្តីពី «ការគិតឡើងវិញអំពីការអប់រំគ្រូបង្រៀនក្នុងយុគសម័យបញ្ញាសិប្បនិម្មិត (Rethinking Teacher Education in the Age of AI) » ក្រោមអធិបតីភាពដ៏ខ្ពង់ខ្ពស់របស់ ឯកឧត្តមសាស្ត្រាចារ្យបណ្ឌិត ឆែម គាតរិទ្ធី ទេសរដ្ឋមន្រ្តី ប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ក៏ជាអ្នកធ្វើបទបង្ហាញផ្ទាល់។ កម្មវិធីបាឋកថាគន្លឹះនេះ មានការអញ្ជើញចូលរួមពី ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង លោកនាយករង លោកព្រឹទ្ធបុរស ព្រឹទ្ធបុរសរងនៃមហាវិទ្យាល័យទាំងបី និងលោកប្រធាន អនុប្រធាន នៃការិយាល័យទាំងបី គ្រូឧទ្ទេស ព្រមទាំងគរុនិស្សិតដែលសរុបចំនួនប្រមាណ៥០០នាក់។

ចូលរួមដោយសេរី៖ ថ្ងៃអង្គារ ៩រោច ខែពិសាខ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២០ ខែឧសភា ឆ្នាំ២០២៥ ចាប់ពីម៉ោង ៧:៣០ ព្រឹក នៅសាលពហុបំណងសាគូរ៉ា នៃវិទ្យាស្ថានគរុកោសល្យបាត់ដំបង។

នាព្រឹកថ្ងៃអាទិត្យ ទី១១ ខែឧសភា ឆ្នាំ២០២៥ វិទ្យាស្ថានគរុកោសល្យបាត់ដំបង បានរៀបចំពិធីប្រគល់វិញ្ញាបនបត្របញ្ជាក់ការសិក្សាជូនដល់សិក្ខាកាមកម្មវិធីអភិវឌ្ឍវិជ្ជាជីវៈជាប្រចាំ(CPD)លើកទី៥ ស្តីពី “គរុកោសល្យ និងវិធីសាស្រ្តបង្រៀនក្នុងបែបថ្មី” ដែលបានបញ្ចប់ការបណ្តុះបណ្តាលប្រកបដោយជោគជ័យ ក្រោមអធិបតីភាព ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង (វ.គ.ប) ដោយមានការអញ្ជើញចូលរួមពី លោក-លោកស្រីនាយក/នាយិការងវិទ្យាស្ថាន លោកព្រឹទ្ធបុរស លោកគ្រូ-អ្នកគ្រូឧទ្ទេស និងសិក្ខាកាមជ័យលាភីប្រមាណ ១៥០ នាក់។

ក្រុងកំពង់ឆ្នាំង៖ នាព្រឹកថ្ងៃសៅរ៍ ទី១០ ខែឧសភា ឆ្នាំ២០២៥ វិទ្យាស្ថានគរុកោសល្យបាត់ដំបង(វគប) សហការជាមួយវិទ្យាស្ថានបច្ចេកវិទ្យាកម្ពុជា(វបក) និងវិទ្យាស្ថានស្រាវជ្រាវដើម្បីការងារអភិវឌ្ឍបារាំង(IRD) បានរៀបចំសិក្ខាសាលាប្រឹក្សាយោបល់រវាងសហគមន៍នេសាទ និងអ្នកវិទ្យាសាស្ត្រ ដើម្បីសិក្សាពីផលប៉ះពាល់នៃចរន្តទឹកបញ្រ្ចាសពីបឹងទន្លេសាបលើការធ្វើចរាចររបស់សហគមន៍ត្រីក្រោមអធិបតីភាព ឯកឧត្តមបណ្ឌិត ជា រដ្ឋា នាយក វគប និងលោកបណ្ឌិត ប៉ូល បូដ្រុង (Dr. Paul Baudron) អ្នកស្រាវជ្រាវជាន់ខ្ពស់វិទ្យាស្ថាន(IRD) និងជាប្រធានគម្រោង FEF-R INVERSAP។ សិក្ខាសាលានេះមានការអញ្ជើញចូលរួមពីតំណាងសហគមន៍នេសាទតាមបណ្តោយដងទន្លេសាប និងក្នុងបឹងទន្លេសាបចំនួន ១៥ នាក់ មន្ត្រីជំនាញពីខណ្ឌជលផលចំនួន ៣ រូប និងអ្នកស្រាវជ្រាវចំនួន ៩ រូប ពី វិទ្យាស្ថានគរុកោសល្យបាត់ដំបង(BTEC) វិទ្យាស្ថានបច្ចេកវិទ្យាកម្ពុជា(វបក) និងវិទ្យាស្ថានស្រាវជ្រាវដើម្បីការងារអភិវឌ្ឍបារាំង(IRD)។ សិក្ខាសាលានេះជាផ្នែកមួយនៃគម្រោង FEF-R Inversap ដែលដឹកនាំអនុវត្តដោយវិទ្យាស្ថាន IRD ដែលគម្រោងនេះមានរយៈពេលមួយឆ្នាំ ទទួលបានមូលនិធិគាំទ្រពីស្ថានទូតបារាំងប្រចំាកម្ពុជាតាមរយៈកម្មវិធី Fonds Équipe France Rapide (FEF-R) ហើយក៏មានការចូលរួមពីអ្នកស្រាវជ្រាវមកពីអាជ្ញាធរទន្លេសាប(TSA) ទាក់ទងនឹងតុល្យភាពទឹកបឹងទន្លេសាបផងដែរ។

វិទ្យាស្ថានគរុកោសល្យបាត់ដំបង (វ.គ.ប) សូមជូនដំណឹងដល់គរុសិស្សនៃវិទ្យាស្ថានគរុកោសល្យបាត់ដំបងឱ្យបានជ្រាបថា៖ វ.គ.ប បាននិងកំពុងសហការជាមួយលេខាធិការដ្ឋានក្រុមប្រឹក្សានីតិកម្មនៃក្រសួងសេដ្ឋកិច្ច និងហិរញ្ញវត្ថុ រៀបចំកម្មវិធីប្រឡងប្រជែងនិពន្ធប្រធានបទច្បាប់ក្នុងវិស័យសេដ្ឋកិច្ចនិងហិរញ្ញវត្ថុ។