កម្មវិធីវេទិកាជជែកដេញដោលគរុនិស្សិតភូមិភាគពាយ័ព្យ ឆ្នាំ២០២៦ វគ្គជម្រុះជុំទី២ ក្រោមប្រធានបទ «ការអនុវត្តគោលការណ៍ “សាលារៀនបៃតងគ្មានធុងសំរាម” គឺជាវិធានការសមស្របក្នុងការឆ្លើយតបទៅនឹងយុត្តិធម៌អាកាសធាតុ» នៅវិទ្យាស្ថានគរុកោសល្យបាត់ដំបង

នារសៀលថ្ងៃសុក្រ ១១រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៦ ខែវិច្ឆិកា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំកម្មវិធី «វេទិកាជជែកដេញដោលគរុនិស្សិតភូមិភាគពាយ័ព្យ ឆ្នាំ២០២៦» វគ្គជម្រុះជុំទី២ ក្រោមប្រធានបទ “ការអនុវត្តគោលការណ៍ “សាលារៀនបៃតងគ្មានធុងសំរាម” គឺជាវិធានការសមស្របក្នុងការឆ្លើយតបទៅនឹងយុត្តិធម៌អាកាសធាតុ” នៅសាលសហសិក្សាចម្ប៉ា។ កម្មវិធីនេះក៏មានការអញ្ជើញចូលរួមពីសំណាក់ លោកនាយករង លោកព្រឹទ្ធបុរស លោកព្រឹទ្ធបុរសរង លោកគ្រូ អ្នកគ្រូឧទ្ទេស លោក លោកស្រីគណៈកម្មការ បុគ្គលិកអប់រំ បេក្ខជនប្រកួតទាំង ៤ក្រុម ព្រមទាំងគរុនិស្សិតទាំងអស់នៃវិទ្យាស្ថានគរុកោសល្យបាត់ដំបងផងដែរ។
ពាក្យថា «ស្អាត បៃតង និងចីរភាព» មិនមែនគ្រាន់តែជាពាក្យស្លោកលម្អនោះទេ ប៉ុន្តែជាបេសកកម្ម និងជាកាតព្វកិច្ចដែលត្រូវស្កាត់ចាប់ផ្តើមចេញពីការអប់រំ ដើម្បីឱ្យលោកគ្រូ អ្នកគ្រូ អាចនាំយកផ្នត់គំនិតដ៏ប្រពៃនេះទៅបញ្ជ្រាប និងអនុវត្តផ្ទាល់ជាមួយសិស្សានុសិស្ស ព្រមទាំងសហគមន៍ទាំងមូល។
ជាលទ្ធផលនៃការប្រកួតប្រជែងយ៉ាងស្វាត់ស្វាញ និងស្មារតីតស៊ូដេញដោលយ៉ាងស្វាហាប់ពេញមួយរសៀលនេះ យើងបានរកឃើញក្រុមជ័យលាភីចំនួន ២ក្រុម ដែលទទួលបានពិន្ទុខ្ពស់ជាងគេ និងត្រូវរៀបចំខ្លួនបន្តដំណើរទៅមុខទៀតនៅក្នុងវគ្គផ្ដាច់ព្រ័ត្រនាថ្ងៃខាងមុខ។ ការឆ្លងផុតវគ្គជម្រុះជុំទី២នេះ មិនត្រឹមតែជាមោទនភាពសម្រាប់បេក្ខជនទាំង ២ក្រុមប៉ុណ្ណោះទេ ប៉ុន្តែក៏ជាសក្ខីភាពបញ្ជាក់ពីសមត្ថភាព ចំនេះដឹងទូទៅ ក្នុងការតវ៉ាវែកញែករបស់គរុនិស្សិតយើងផងដែរ។ គណៈគ្រប់គ្រងវិទ្យាស្ថាន សូមចូលរួមអបអរសាទរយ៉ាងកក់ក្តៅបំផុតចំពោះក្រុមជ័យលាភីទាំង ២ក្រុម និងសូមកោតសរសើរដោយស្មោះចំពោះរាល់បេក្ខជនទាំងអស់ដែលបានខិតខំប្រឹងប្រែងអស់ពីសមត្ថភាព។ សូមជូនពរឱ្យក្រុមដែលត្រូវបន្តទៅវគ្គផ្ដាច់ព្រ័ត្រខាងមុខ ខិតខំស្រាវជ្រាវ បង្កើនសមត្ថភាពបន្ថែមទៀត ដើម្បីទទួលបានលទ្ធផលកាន់តែល្អប្រសើរ និងសូមឱ្យស្មារតី «ស្អាត បៃតង និងចីរភាព» នេះ ស្ថិតនៅក្នុងបេះដូងរបស់គរុនិស្សិតគ្រប់ៗរូបជានិច្ច!

០៦ វិច្ឆិកា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia