ពិធីអបអរសាទរ ខួបលើកទី២៩ ទិវាគ្រូបង្រៀន

នាថ្ងៃទី០៥ ខែតុលា ឆ្នាំ២០២៦ នេះ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានដឹកនាំគណៈគ្រប់គ្រង និងមន្ត្រីរាជការនៃវិទ្យាស្ថានគរុកោសល្យបាត់ដំបង ចូលរួមពិធីអបអរសាទរ ខួបលើកទី២៩ ទិវាគ្រូបង្រៀន ០៥ តុលា ក្រោមប្រធានបទ «គ្រូបង្រៀន ជាសសរស្ដម្ភនៃគរុកោសល្យទំនើប ដើម្បីកសាងធនធានមនុស្សសតវត្សរ៍ទី២១» ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រមទាំងមានការអញ្ជើញចូលរួមជាគណៈអធិបតីពី ឯកឧត្តម យស់ អ៊ាង ប្រធានសមាគមបុគ្គលិកសិក្សាខ្មែរ និង ឯកឧត្តម Flavio BONETTI នាយកការិយាល័យ និងតំណាងអង្គការយូណេស្គូប្រចាំប្រទេសកម្ពុជា។
នៅក្នុងឱកាសដ៏មហោឡារិកនេះដែរ ឯកឧត្តមបណ្ឌិតនាយកវិទ្យាស្ថាន ក៏បានអញ្ជើញធ្វើជាវាគ្មិន៖
១. ធ្វើបទបង្ហាញ លើប្រធានបទ៖ «បរិវត្តកម្មវិធីសាស្រ្តបង្រៀនដើម្បីលើកកម្ពស់បំណិនសតវត្សរ៍ទី២១៖ យុទ្ធសាស្ត្រដឹកនាំ និងឧត្ដមានុវត្តន៍នៃការបណ្តុះបណ្តាលនៅវិទ្យាស្ថានគរុកោសល្យ»
២. ចូលរួមក្នុងកិច្ចពិភាក្សាតុមូល ក្រោមប្រធានបទ៖ «គរុកោសល្យទំនើប ដើម្បីលើកកម្ពស់បំណិនសតវត្សរ៍ទី២១ ឆ្ពោះទៅ PISA»។
ការចែករំលែកបទពិសោធន៍ និងទស្សនវិស័យដ៏មានតម្លៃនាឱកាសនេះ មិនត្រឹមតែបានស្តែងឱ្យឃើញពីការប្តេជ្ញាចិត្តយ៉ាងមុតមាំរបស់វិទ្យាស្ថានគរុកោសល្យបាត់ដំបង ក្នុងការធ្វើបរិវត្តកម្មវិធីសាស្ត្របង្រៀនប៉ុណ្ណោះទេ ប៉ុន្តែថែមទាំងជាការជំរុញទឹកចិត្តដល់លោកគ្រូ អ្នកគ្រូ និងគ្រូឧទ្ទេសទាំងអស់ ឱ្យបន្តខិតខំអភិវឌ្ឍសមត្ថភាពឆ្លើយតបទៅនឹងស្តង់ដារអប់រំទំនើប សំដៅចូលរួមចំណែកយ៉ាងសកម្មក្នុងការលើកកម្ពស់គុណភាពអប់រំនៅកម្ពុជាឱ្យកាន់តែឈានឡើងមួយកម្រិតទៀត។

០៥ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia