ពិធីបិទសិក្ខាសាលាបច្ចេកទេសលើកទី២ ស្ដីពី “ការចងក្រងឯកសារការអប់រំការប្រែប្រួលអាកាសធាតុ សម្រាប់ការបញ្ជ្រាបក្នុងកម្មវិធីអប់រំគ្រូបង្រៀនបឋមសិក្សា និងវគ្គអភិវឌ្ឍសមត្ថភាពគ្រូឧទ្ទេស”

ក្នុងរយៈពេល ៤ថ្ងៃពេញ ចាប់ពីថ្ងៃទី១៥ ដល់ថ្ងៃទី១៨ ខែធ្នូ ឆ្នាំ២០២៥ សិក្ខាសាលាបច្ចេកទេសលើកទី២នេះ បានប្រព្រឹត្តទៅដោយជោគជ័យ និងមានការចូលរួមយ៉ាងសកម្មពីតំណាងអគ្គនាយកដ្ឋានបណ្ដុះបណ្ដាល និងវិក្រឹតការ គណៈគ្រប់គ្រងនិងគ្រូឧទ្ទេសនៃវិទ្យាស្ថានគរុកោសល្យបាត់ដំបង ព្រមទាំងគ្រូឧទ្ទេសតំណាងពីវិទ្យាស្ថានគរុកោសល្យរាជធានីភ្នំពេញ និង សាលាគរុកោសល្យ និងវិក្រឹតការ ខេត្តពោធិ៍សាត់។
សិក្ខាសាលានេះមានការគាំទ្រពី អង្គការ UNESCO តាមរយៈគម្រោង ”គំនិតផ្ដួចផ្ដើមនៃប្រព័ន្ធអប់រំអាកាសធាតុឆ្លាតវៃ (CSESI)” និងសម្របសម្រួលដោយក្រសួងអប់រំ យុវជន និងកីឡា តាមរយៈអគ្គនាយកដ្ឋានបណ្ដុះបណ្ដាល និងវិក្រឹតការ។
លទ្ធផលសំខាន់ៗដែលបានសម្រេច
1. បញ្ចប់ការត្រួតពិនិត្យ CLO & LLO ដែលបានកែសម្រួលពីវគ្គទី១ ដោយមានការពិភាក្សាពីក្រុមការងារបច្ចេកទេសអនុវត្ដគម្រោង
2. ផលិតសេចក្តីព្រាងនៃកិច្ចតែងការបង្រៀនបញ្ជ្រាប តាមរយៈកិច្ចពិភាក្សាក្រុម និងបទបង្ហាញឆ្លុះបញ្ចាំង
3. សរសេរខ្លឹមសារមេរៀនតាមជំពូក ដើម្បីកសាងជាមូលដ្ឋានគ្រឹះសម្រាប់ការបញ្ជ្រាប
4. បង្ហាញសេចក្តីលម្អិតនៃខ្លឹមសារមេរៀន ដើម្បីទទួលបានធាតុចូលបន្ថែម និងបញ្ចប់សេចក្តីព្រាង
5. កំណត់សកម្មភាពបន្ត សម្រាប់ដំណាក់កាលបន្ទាប់នៃការងារចងក្រងឯកសារ។
លោក ហ៊ុន រ៉ាវី ព្រឹទ្ធបុរសមហាវិទ្យាល័យអប់រំវិទ្យាសាស្ដ្រ នៃវិទ្យាស្ថានគរុកោសល្យបាត់ដំបង បានដឹកនាំកម្មវិធីបិទសិក្ខាសាលាបច្ចេកទេសលើកទី២នេះ។ ក្នុងសុន្ទរកថាបិទ លោកបានថ្លែងអំណរគុណដល់អង្គការ UNESCO ក្រសួងអប់រំ យុវជន និងកីឡា និងអ្នកចូលរួមទាំងអស់។ លោកបានលើកឡើងថា សិក្ខាសាលានេះជាជំហានដ៏សំខាន់ក្នុងការរៀបចំកញ្ចប់ឯកសារបញ្ជ្រាប ការអប់រំការប្រែប្រួលអាកាសធាតុ ទៅក្នុងកម្មវិធីបណ្ដុះបណ្ដាលគ្រូបង្រៀន និងការអភិវឌ្ឍសមត្ថភាពគ្រូឧទ្ទេស។
ការងារដែលបានសម្រេច នឹងក្លាយជាមូលដ្ឋានដ៏រឹងមាំសម្រាប់ការបន្តអភិវឌ្ឍឯកសារនិងការបង្រៀន ដើម្បីបង្កើតគ្រូជំនាន់ថ្មីដែលមានចំណេះដឹង និងសមត្ថភាពក្នុងការបង្រៀនសិស្សឱ្យមានការយល់ដឹង និងទំនួលខុសត្រូវចំពោះបញ្ហាប្រែប្រួលអាកាសធាតុ។
វិទ្យាស្ថានគរុកោសល្យបាត់ដំបង សូមអបអរសាទរ និងថ្លែងអំណរគុណដល់ថ្នាក់ដឹកនាំ និងក្រុមការងារបច្ចេកទេសទាំងអស់ ដែលបានចូលរួមយ៉ាងសកម្មក្នុងសិក្ខាសាលាបច្ចេកទេសលើកទី២នេះ។
លទ្ធផលដែលបានសម្រេចបង្ហាញពី ទំនួលខុសត្រូវដ៏ខ្ពស់ និងការផ្ដល់តម្លៃលើការអប់រំអាកាសធាតុ ដែលនឹងក្លាយជាមូលដ្ឋានសម្រាប់ការបន្តអភិវឌ្ឍកម្មវិធីបណ្ដុះបណ្ដាលគ្រូបង្រៀន និងការបង្កើតជំនាន់គ្រូថ្មីមានសមត្ថភាព។

បាត់ដំបង | ១៨ ធ្នូ ២០២៥

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia