ពិធីសំណេះសំណាលជាមួយបុគ្គលិកអប់រំ គរុនិស្សិត និងបាឋកថាគន្លឹះ ស្តីពី “កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០”

បាត់ដំបង៖ នាព្រឹកថ្ងៃទី១៣ ខែមិថុនា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមប្រឹក្សាបច្ចេកទេស នៃវិទ្យាស្ថានគរុកោសល្យបាត់ដំបង បានអញ្ជើញជាអធិបតីក្នុង ពិធីសំណេះសំណាលជាមួយបុគ្គលិកអប់រំ គរុនិស្សិត និងបាឋកថាគន្លឹះ ស្តីពី “កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០” នៅសាលមហោស្រពស្ទឹងសង្កែ ខេត្តបាត់ដំបង។ ពិធីនេះ មានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា តំណាងក្រុមប្រឹក្សាខេត្ត អភិបាលរងនៃគណៈអភិបាលខេត្តបាត់ដំបង ឯកឧត្តមបណ្ឌិតនាយកវិទ្យាស្ថានគរុកោសល្យបាត់ដំបង ឯកឧត្តមសាកលវិទ្យាធិការ សាកលវិទ្យាល័យជាតិបាត់ដំបង គណៈគ្រប់គ្រង និងបុគ្គលិកអប់រំ នៃវិទ្យាស្ថានគរុកោលស្យបាត់ដំបង (វ.គ.ប) ប្រធានមន្ទីរមុខងារសាធារណៈ ប្រធានមន្ទីអ.យ.ក ប្រធានការិយាល័យអប់រំក្រុង ស្រុកទាំង១៤ បុគ្គលិកអប់រំគ្រប់លំដាប់ថ្នាក់ នៃអនុវិទ្យាល័យអនុវត្តន៍ និងបឋមសិក្សាអនុវត្តន៍ គ្រូបង្រៀនគ្រប់កម្រិត គរុនិស្សិត សិក្ខាកាមវគ្គបណ្តុះបណ្តាលវិជ្ជាជីវៈជាប្រចាំ សរុបចំនួនប្រមាណ ១៥៦៥នាក់។
បន្ទាប់ពីស្តាប់របាយការណ៍ ស្តីពី ការបណ្តុះបណ្តាលគ្រូបង្រៀនតាមប្រព័ន្ធ ១២+៤ និងបរិញ្ញាបត្រ+១ របស់ ឯកឧត្តមបណ្ឌិត នាយកវិទ្យាស្ថានគរុកោសល្យបាត់ដំបង រួចមក ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមវាយតម្លៃខ្ពស់ចំពោះគណៈគ្រប់គ្រង គ្រូឧទេ្ទស និងបុគ្គលិកអប់រំគ្រប់លំដាប់ថ្នាក់នៃ វ.គ.ប ដែលបានខិតខំប្រឹងប្រែងបំពេញការងារប្រកបដោយស្មារតីទទួលខុសត្រូវខ្ពស់ មានភាពបត់បែននិងភាពធន់ ដើម្បីឆ្លើយតបទៅនឹងចក្ខុវិស័យ ផែនការយុទ្ធសាស្ត្ររបស់ក្រសួងអប់រំ ក្នុងកំណែទម្រង់ការអប់រំចាប់ពីដំណាក់កាលទី១ និងដំណាក់កាលទី២ ដែលបាននិងកំពុងអនុវត្តយ៉ាងសកម្មនាពេលនេះ។
តាងនាមឱ្យក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមកោតសរសើរ និងទទួលស្គាល់នូវលទ្ធផលជោគជ័យជាទីមោទននៃការបណ្តុះបណ្តាលគ្រូបង្រៀនបឋមសិក្សា និងអនុវិទ្យាល័យ ទាំងតាមប្រព័ន្ធ ១២+៤ និងបរិញ្ញាបត្រ+១ របស់វិទ្យាស្ថានគរុកោសល្យបាត់ដំបងនាពេលកន្លងមកនេះ និងកិច្ចខិតខំប្រឹងប្រែងអភិវឌ្ឍសមត្ថភាពរបស់គរុនិស្សិតទាំងអស់ដែលជាកម្លាំងចលករដ៏សំខាន់ក្នុងកំណែទម្រង់គុណភាពអប់រំនៅកម្ពុជា។
បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានសំណេះសំណាលសាកសួរសុខទុក្ខស្ថានភាពការងារ ជីវភាពរស់នៅ និងបញ្ហាប្រឈមនានា របស់បុគ្គលិកអប់រំ ក៏ដូចជាការរៀននិងបង្រៀនរបស់គរុនិស្សិតទាំងអស់ ដោយសូមលើកទឹកចិត្តដល់ បុគ្គលិកអប់រំគ្រប់កម្រិត ជាពិសេសគរុនិស្សិតគ្រូបង្រៀនកិច្ចសន្យា និងគ្រូបឋមសិក្សាផ្អែកលើកិច្ចព្រងព្រៀងការងារ ដែលកំពុងបង្រៀននិងទទួលការបណ្តុះបណ្តាលនៅ គរុកោសល្យនៅវិទ្យាស្ថានគរុកោសល្យបាត់ដំបង ឱ្យបន្តខិតខំរៀនសូត្រអភិវឌ្ឍសមត្ថភាព ចែករំលែកចំណេះដឹង ជំនាញ និងបទពិសោធដល់សិស្សគ្រប់រូប ដើម្បីធានាបាននូវការអប់រំប្រកបដោយបរិយាបន្ន និងសមធម៌ ដោយគូសបញ្ជាក់ថា ពេលយើងរួមគ្នាបង្កើតបាននូវសមិទ្ធផល និងវឌ្ឍនភាពលើវិស័យអប់រំ យើងនឹងទទួលបាននូវទំនុកចិត្ត និងការគាំទ្របន្ថែមទៀតពីគ្រប់មជ្ឈដ្ឋាន ដែលនេះជាកម្លាំងជំរុញដ៏សំខាន់ឆ្ពោះទៅសម្រេចឧត្តមភាពការអប់រំ។
តាមរយៈសុន្ទរកថា និងបាឋកថាគន្លឹះ ស្តីពី “កំណែទម្រង់គ្រូបង្រៀនក្នុងបរិវត្តកម្មឌីជីថលឆ្ពោះទៅកម្ពុជាឆ្នាំ២០៥០” ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានគូសរំលេចចំណុចសំខាន់ៗ មួយចំនួនដូចជា៖
១. ចក្ខុវិស័យកម្ពុជាឆ្នាំ ២០៥០៖ អភិវឌ្ឍធនធានមនុស្ស និងជំនាញពេញមួយជីវិតក្នុងគោលដៅបំពាក់នូវចំណេះ, អំណត់ធន់ និងសីលធម៌ ដើម្បីបង្កើនមូលធនមនុស្សប្រកបដោយគុណភាព, បច្ចេកវិទ្យា និងនវានុវត្តន៍។
២. ការកសាងមូលធនមនុស្ស ត្រូវឈរលើការបណ្តុះចំណេះដឹងវិទ្យាសាស្ត្រ ភាពស៊ូទ្រាំ និងសីលធម៌ ដែលជាទស្សនវិជ្ជាថ្មីនៃភាពរីកចម្រើនបន្ថែមលើសារៈសំខាន់នៃចំណេះដឹង និងការវិនិយោគលើការអប់រំ។
៣. យុទ្ធសាស្ត្របញ្ចកោណ ដំណាក់កាលទី១ ផ្តោតលើ ការអភិវឌ្ឍមូលធនមនុស្ស ក្រសួងបាននិងកំពុង ១)បន្តកែទម្រង់អភិបាលកិច្ចសាលារៀន ជំរុញការអនុវត្តស្តង់ដាសាលារៀនគំរូ និងសាលារៀនជំនាន់ថ្មី ២) គុណភាពនៃការបណ្តុះបណ្តាលគ្រូបង្រៀន៖ កែលម្អវិធីសាស្ត្របង្រៀន បន្តលើកកម្ពស់ជីវភាព និងគុណតម្លៃ បុគ្គលិកអប់រំគ្រប់កម្រិត។
៤. ការអប់រំឌីជីថល ហេដ្ឋារចនាសម្ព័ន្ធឌីជីថល វិទ្យាសាស្ត្រ និងបច្ចេកវិទ្យា ការពង្រឹងអភិបាលកិច្ចគ្រឹះស្ថានឧត្តមសិក្សា ការស្រាវជ្រាវ ការអភិវឌ្ឍនិងនវានុវត្តន៍។ ការអភិវឌ្ឍសេដ្ឋកិច្ច និងសង្គមឌីជីថល៖ ១) ធនធានមនុស្ស និងអ្នកមានទេពកោសល្យក្នុងជំនាញវិទ្យាសាស្ត្រ បច្ចេកវិទ្យា និងនវានុវត្តន៍ ២)សមត្ថភាពនៃការស្រាវជ្រាវ ការអភិវឌ្ឍ និងការនវានុវត្តន៍នៅតាមគ្រឹះស្ថានសិក្សា និងគ្រឹះស្ថានបណ្តុះបណ្តាលគ្រូ។
៥. ក្នុងយុគសម័យបច្ចេកវិទ្យាឌីជីថល ឬ បរិវត្តកម្មឌីជីថល គុណភាពគ្រូបង្រៀនមិនមែនវាស់វែងតែលើសញ្ញាបត្រនោះទេ គឺត្រូវផ្អែកលើសមត្ថភាពនៃការអភិវឌ្ឍវិជ្ជាជីវៈជាប្រចាំ(CPD) និងការរៀនសូត្រពេញមួយជីវិត ដើម្បីឱ្យគ្រូបង្រៀនមានសមត្ថភាពគ្រប់គ្រាន់ ដើរឱ្យទាន់ការប្រែប្រួលសកលលោក។ ដូច្នេះ ការធ្វើកំណែទម្រង់ការអប់រំគ្រូបង្រៀន គឺជាកិច្ចការដែលត្រូវធ្វើជាប្រចាំ និងឥតឈប់ឈរ។
៦. សូមលោកគ្រូ អ្នកគ្រូ បុគ្គលិកអប់រំទាំងអស់ បន្តអភិវឌ្ឍវិជ្ជាជីវៈជាប្រចាំ ធ្វើការស្រាវជ្រាវ អភិវឌ្ឍសមត្ថភាពភាសាបរទេស សមត្ថភាពបច្ចេកវិទ្យាឌីជីថល ដើម្បីឆ្លើយតបទៅនឹងស្តង់ដាវិជ្ជាជីវៈគ្រូបង្រៀន និងសូមចងចាំថា គ្រូបង្រៀន គឺជាសរសៃឈាម និងជាកម្លាំងចលករជួរមុខ នៃដំណើរការកំណែទម្រង់ការអប់រំ។
៧. ក្រសួងត្រូវការចាំបាច់ណាស់នូវការចូលរួមយ៉ាងសកម្មរបស់លោកគ្រូ អ្នកគ្រូ ប្អូនៗគរុនិស្សិត សិស្សានុសិស្ស គ្រឹះស្ថានសិក្សា ការគាំទ្រពីសហគមន៍ និងដៃគូរអភិវឌ្ឍន៍ទាំងអស់ ដើម្បីឱ្យដំណើរការអប់រំនៅកម្ពុជាសម្រេចបានជាផ្លែផ្កាពិតប្រាកដ បណ្តុះបាននូវធនធានមនុស្សប្រកបដោយសក្តានុពលសម្រាប់ចូលរួមអភិវឌ្ឍប្រទេសជាតិ ដែលនេះជាមោទនភាពដ៏ធំបំផុតក្នុងអាជីពជាគ្រូបង្រៀន៕

១៣ មិថុនា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia