ជំនួបសម្ដែងការគួរសម និងពិភាក្សាការងារជាមួយ ឯកឧត្តម MATSUMOTO Yohei រដ្ឋមន្ត្រីក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា នៃប្រទេសជប៉ុន

រាជធានីភ្នំពេញ៖ នាព្រឹកថ្ងៃទី០៩ ខែកញ្ញា ឆ្នាំ២០២៦ ឯកឧត្តមបណ្ឌិត ជា រដ្ឋា បានអញ្ជើញចូលរួមអមដំណើរ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងឱកាសទទួលស្វាគមន៍ សម្ដែងការគួរសម និងពិភាក្សាការងារជាមួយ ឯកឧត្តម MATSUMOTO Yohei រដ្ឋមន្ត្រីក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យា (MEXT) នៃប្រទេសជប៉ុន នៅវិទ្យាស្ថានគរុកោសល្យរាជធានីភ្នំពេញ (PTEC)។
ក្នុងជំនួបនោះ ភាគីទាំងពីរបានពិភាក្សា និងវាយតម្លៃខ្ពស់ចំពោះកិច្ចសហប្រតិបត្តិការលើវិស័យអប់រំកន្លងមក ជាពិសេសការគាំទ្ររបស់រដ្ឋាភិបាលជប៉ុនលើការបណ្តុះបណ្តាលគ្រូបង្រៀន ការអភិវឌ្ឍហេដ្ឋារចនាសម្ព័ន្ធអប់រំ និងការលើកកម្ពស់គុណភាពបង្រៀនមុខវិជ្ជាវិទ្យាសាស្ត្រ និងគណិតវិទ្យា ដែលបានរួមចំណែកធ្វើឱ្យលទ្ធផលតេស្ត PISA របស់កម្ពុជាសម្រេចបានលទ្ធផលល្អប្រសើរ។
ទន្ទឹមនឹងនេះ ភាគីទាំងពីរក៏បានពិភាក្សាអំពីទិសដៅការងារបន្ត លើការពង្រីកវិធីសាស្ត្របង្រៀនបែបជប៉ុន ការចែករំលែកបទពិសោធក្នុងការរៀបចំសៀវភៅសិក្សាគោល ការអប់រំកម្រិតមត្តេយ្យសិក្សា ព្រមទាំងការជំរុញការបង្រៀនភាសាជប៉ុន និងការផ្តល់អាហារូបករណ៍ដល់សិស្ស-និស្សិតកម្ពុជា។
បន្ទាប់ពីជំនួបពិភាក្សា ឯកឧត្តមបណ្ឌិត ជា រដ្ឋា ក៏បានរួមដំណើរជាមួយគណៈប្រតិភូជាន់ខ្ពស់នៃប្រទេសទាំងពីរ អញ្ជើញចុះទស្សនកិច្ចជាក់ស្តែងនៅតាមបន្ទប់ពិសោធន៍ បន្ទប់តន្ត្រី និងបណ្ណាល័យនៃវិទ្យាស្ថានគរុកោសល្យរាជធានីភ្នំពេញ ដែលជាសមិទ្ធផលកើតចេញពីកិច្ចសហប្រតិបត្តិការរវាងកម្ពុជា និងជប៉ុន ប្រកបដោយបរិយាកាសស្និទ្ធស្នាល និងផ្លែផ្កា៕

០៩ កញ្ញា ២០២៦ | ភ្នំពេញ

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia