ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង អញ្ជើញចូលរួមជាវាគ្មិនកិត្តិយស និងធ្វើបទបង្ហាញក្នុងទិវាគ្រូបង្រៀន ៥ តុលា ២០២៦

រាជធានីភ្នំពេញ៖ នាថ្ងៃទី០៥ ខែតុលា ឆ្នាំ២០២៦ ក្នុងឱកាសប្រារព្ធពិធីអបអរសាទរ ខួបលើកទី២៩ ទិវាគ្រូបង្រៀន ៥ តុលា ក្រោមប្រធានបទ «គ្រូបង្រៀន ជាសសរស្ដម្ភនៃគរុកោសល្យទំនើប ដើម្បីកសាងធនធានមនុស្សសតវត្សរ៍ទី២១» ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានអញ្ជើញចូលរួមជាវាគ្មិនកិត្តិយសក្នុងកិច្ចពិភាក្សាតុមូល និងធ្វើបទបង្ហាញកម្រិតបច្ចេកទេស ដោយមានការសម្របសម្រួលពី ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា។
នៅក្នុងឱកាសនោះ ឯកឧត្តមបណ្ឌិតនាយកបានធ្វើបទបង្ហាញលើប្រធានបទ «បរិវត្តកម្មវិធីសាស្ត្របង្រៀនដើម្បីលើកកម្ពស់បំណិនសតវត្សរ៍ទី២១៖ យុទ្ធសាស្ត្រដឹកនាំ និងឧត្តមានុវត្តន៍នៃការបណ្តុះបណ្តាលនៅវិទ្យាស្ថានគរុកោសល្យ» ព្រមទាំងចូលរួមពិភាក្សាលើប្រធានបទ «គរុកោសល្យទំនើប ដើម្បីលើកកម្ពស់បំណិនសតវត្សរ៍ទី២១ ឆ្ពោះទៅ PISA» ដោយបានគូសបញ្ជាក់អំពីខ្លឹមសារសំខាន់ៗ រួមមាន៖
- បរិវត្តកម្មវិធីសាស្ត្របង្រៀន៖ ការប្រែប្រួលតួនាទីគ្រូបង្រៀនពី «អ្នកផ្ទេរចំណេះដឹង» ទៅជា «អ្នកសម្របសម្រួល និងរៀបចំការសិក្សា» ដើម្បីជម្រុញការសិក្សាសកម្មរបស់សិស្ស។
- យុទ្ធសាស្ត្រគន្លឹះទាំង ៤ នៃការបណ្ដុះបណ្ដាល៖ ១. ការអភិវឌ្ឍសមត្ថភាពគ្រូឧទ្ទេស និងកម្មវិធីសិក្សា ២. ការអនុវត្តវិធីសាស្ត្របង្រៀនផ្អែកលើស្តង់ដារវិទ្យាសាស្ត្រ និងភស្តុតាង ៣. ការជំរុញការច្នៃប្រឌិត និងការស្រាវជ្រាវ និង ៤. ការប្រើប្រាស់ទិន្នន័យជាក់ស្តែងដើម្បីធ្វើសេចក្តីសម្រេចចិត្តក្នុងការកែលម្អគុណភាព។
- ការធ្វើសមាហរណកម្ម EdTech & AI៖ ការបំពាក់បំណិនឌីជីថល និងការប្រើប្រាស់ប្រព័ន្ធបញ្ញាសិប្បនិម្មិត (AI) ក្នុងការរៀបចំការបង្រៀន ការស្រាវជ្រាវ និងការបង្កើតសម្ភារឧបទេស ដើម្បីឆ្លើយតបទៅនឹងស្តង់ដារវាយតម្លៃអន្តរជាតិ (PISA)។
កិច្ចពិភាក្សាបានប្រព្រឹត្តទៅដោយរលូន និងទទួលបានលទ្ធផលយ៉ាងផ្លែផ្កា ក្នុងការចូលរួមចំណែកលើកកម្ពស់គុណភាពនៃការបណ្ដុះបណ្ដាលគ្រូបង្រៀននៅកម្ពុជា។

០៥ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia