បាឋកថាស្ដីពី សមិទ្ធផលកំណែទម្រង់គ្រឹះស្ថានបណ្តុះបណ្តាលគ្រូបង្រៀនរយៈពេល១០ឆ្នាំចុងក្រោយ «ដំណើរឆ្ពោះទៅការកសាងឧត្តមភាពការអប់រំគ្រូបង្រៀននៅកម្ពុជា»

បាត់ដំបង៖ ថ្ងៃព្រហស្បតិ៍ ១១កើត ខែបឋមាសាឍ ឆ្នាំមមី អដ្ឋស័ក ព.ស. ២៥７០ ត្រូវនឹងថ្ងៃទី២៥ ខែមិថុនា ឆ្នាំ២០២៦ វេលាម៉ោង ៨និង០០នាទីព្រឹក ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានអញ្ជើញជាវាគ្មិនក្នុងបាឋកថាស្ដីពី សមិទ្ធផលកំណែទម្រង់គ្រឹះស្ថានបណ្តុះបណ្តាលគ្រូបង្រៀនរយៈពេល១០ឆ្នាំចុងក្រោយ «ដំណើរឆ្ពោះទៅការកសាងឧត្តមភាពការអប់រំគ្រូបង្រៀននៅកម្ពុជា» ដែលប្រព្រឹត្តិទៅនៅសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង ក្រោមព្រះអធិបតីភាព ព្រះយសបញ្ញាបណ្ឌិត វី សុវិជ្ជា ព្រះប្រធានសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង។ កម្មវិធីនេះមានការនិមន្ត-អញ្ជើញចូលរួមពីសំណាក់ សាមណនិស្សិត នាយករង ព្រឹទ្ធបុរស ព្រឹទ្ធបុរសរង លោកគ្រូ អ្នកគ្រូ និងនិស្សិត។
កម្មវិធីនេះរៀបចំឡើងក្នុងគោលបំណងផ្ដល់នូវចំណេះដឹង ទស្សនវិស័យ និងការយល់ដឹងស៊ីជម្រៅដល់សាមណនិស្សិត និស្សិត លោកគ្រូ អ្នកគ្រូ និងអ្នកចូលរួមទាំងអស់ អំពូប្រវត្តិនៃកំណែទម្រង់ការបណ្តុះបណ្តាលគ្រូបង្រៀននៅកម្ពុជា ក្នុងរយៈពេល ១០ ឆ្នាំចុងក្រោយ ដែលជាដំណាក់កាលដ៏សំខាន់ក្នុងការពង្រឹងគុណភាពប្រព័ន្ធអប់រំជាតិ។ តាមរយៈបាឋកថានេះ អ្នកចូលរួមនឹងទទួលបានការយល់ដឹងអំពីបរិបទ ប្រវត្តិ និងមូលហេតុនានាដែលជំរុញឱ្យមានការកែទម្រង់លើការបណ្តុះបណ្តាលគ្រូបង្រៀន ព្រមទាំងបញ្ហាប្រឈមដែលវិស័យអប់រំកម្ពុជាបានជួបប្រទះ និងវិធានការដែលរាជរដ្ឋាភិបាល និងក្រសួងអប់រំ យុវជន និងកីឡា បានដាក់ចេញដើម្បីដោះស្រាយ។
ជាមួយគ្នានេះដែរ កម្មវិធីមានគោលបំណងបង្ហាញពីសមិទ្ធផលជាក់ស្តែងដែលសម្រេចបានក្នុងការអភិវឌ្ឍគុណភាពគ្រូបង្រៀន ដូចជា ការលើកកម្ពស់គុណវុឌ្ឍិ និងសមត្ថភាពវិជ្ជាជីវៈគ្រូ ការកែលម្អកម្មវិធីបណ្តុះបណ្តាលគ្រូឱ្យស្របតាមស្តង់ដាជាតិ និងអន្តរជាតិ ការពង្រឹងគ្រឹះស្ថានបណ្តុះបណ្តាលគ្រូ ការលើកកម្ពស់ជីវភាព និងកិត្តិយសវិជ្ជាជីវៈគ្រូ ព្រមទាំងការបញ្ចូលបច្ចេកវិទ្យាឌីជីថល និងបញ្ញាសិប្បនិម្មិត (AI) ក្នុងដំណើរការបណ្តុះបណ្តាលគ្រូសម្រាប់សតវត្សទី២១។
លើសពីនេះ បាឋកថានេះក៏មានគោលបំណងជំរុញការផ្លាស់ប្តូរគំនិត ការចែករំលែកបទពិសោធន៍ និងការសិក្សាពីគំរូជោគជ័យក្នុងការអភិវឌ្ឍគ្រឹះស្ថានបណ្តុះបណ្តាលគ្រូ ដើម្បីឱ្យអ្នកចូលរួមអាចមើលឃើញពីតួនាទី និងសារៈសំខាន់របស់គ្រូបង្រៀនក្នុងការកសាងធនធានមនុស្សប្រកបដោយគុណភាព សមត្ថភាព និងសីលធម៌ និងជាការលើកទឹកចិត្តដល់សាមណនិស្សិត និងនិស្សិតឱ្យមានការចាប់អារម្មណ៍លើវិជ្ជាជីវៈគ្រូបង្រៀន ក្នុងការចូលរួមចំណែកក្នុងការអភិវឌ្ឍវិស័យអប់រំជាតិ។
តាមរយៈការធ្វើបទបង្ហាញ និងការចែករំលែកបទពិសោធន៍ជាក់ស្តែង ឯកឧត្តមបណ្ឌិត ជា រដ្ឋា បានលើកឡើងពីវឌ្ឍនភាព និងសមិទ្ធផលនានានៃការកែទម្រង់វិស័យបណ្តុះបណ្តាលគ្រូបង្រៀន ដែលបានរួមចំណែកយ៉ាងសំខាន់ដល់ការលើកកម្ពស់គុណភាពអប់រំ និងការកសាងធនធានមនុស្សប្រកបដោយសមត្ថភាព សីលធម៌ និងការសម្រេចឱ្យបាននូវទិសដៅអភិវឌ្ឍមូលធនមនុស្សដែលជាផ្នែកមួយនៃចក្ខុវិស័យកម្ពុជាឆ្នាំ២០៥០។

២៥ មិថុនា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia