កិច្ចប្រជុំស្ដីពី “ការរៀបចំបំណែងចែកតួនាទី-ភារកិច្ច មន្រ្តីការិយាល័យរដ្ឋបាល បុគ្គលិក និងគណនេយ្យ” នៃវិទ្យាស្ថានគរុកោសល្យបាត់ដំបង។

នារសៀលថ្ងៃពុធ ទី១៨ ខែកុម្ភៈ ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំកិច្ចប្រជុំ ស្ដីពី “ការរៀបចំបំណែងចែកតួនាទី-ភារកិច្ច មន្រ្តីការិយាល័យរដ្ឋបាល បុគ្គលិក និងគណនេយ្យ” ដែលដឹកនាំដោយ លោក ថ្លាង សន្ដំ នាយករងវិទ្យាស្ថាន តំណាង ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងការអញ្ជើញពី លោកប្រធានស្ដីទី លោក លោកស្រី អនុប្រធាន និងមន្រ្តីការិយាល័យរដ្ឋបាល បុគ្គលិក និងគណនេយ្យ។
នៅក្នុងកិច្ចដំណើរការនៃកិច្ចប្រជុំនេះ លោក ថ្លាង សន្ដំ នាយករងវិទ្យាស្ថាន បានដឹកនាំពិនិត្យ និងសម្របសម្រួលលើការបែងចែកតួនាទី-ភារកិច្ច ដូចខាងក្រោម៖ (១) ផ្នែករដ្ឋបាល៖ ពិនិត្យលើការរៀបចំបំណែងចែកភារកិច្ចក្នុងការគ្រប់គ្រងចរន្តលិខិតចេញ-ចូល ការរក្សាទុកឯកសារតាមបែបឌីជីថល និងការកំណត់អ្នកទទួលខុសត្រូវច្បាស់លាស់លើកិច្ចការពិធីការ រៀបចំសម្ភារៈ បរិវេណ និងការសម្របសម្រួលក្នុងអង្គពិធី ឬកិច្ចប្រជុំផ្សេងៗ ដើម្បីធានាបាននូវសណ្តាប់ធ្នាប់ និងប្រសិទ្ធភាពនៃការទំនាក់ទំនង។
(២) ផ្នែកបុគ្គលិក៖ ពិនិត្យលើការបែងចែកភារកិច្ចគ្រប់គ្រងទិន្នន័យមន្ត្រីរាជការ និងបុគ្គលិកកិច្ចសន្យា តាមរយៈការធ្វើបច្ចុប្បន្នភាពស្ថិតិ និងការតាមដានវត្តមាន-ការអនុវត្តការងារប្រចាំថ្ងៃ។ បន្ថែមពីនេះ ត្រូវរៀបចំអ្នកទទួលបន្ទុកលើការរៀបចំផែនការអភិវឌ្ឍសមត្ថភាព និងការវាយតម្លៃស្នាដៃដើម្បីស្នើសុំគ្រឿងឥស្សរិយយសជូនមន្ត្រី ដែលជាយន្តការលើកទឹកចិត្តក្នុងអង្គភាព។
(៣) ផ្នែកហិរញ្ញវត្ថុ និងគណនេយ្យ៖ ពិនិត្យលើការកំណត់តួនាទីក្នុងការរៀបចំផែនការចំណាយឱ្យស្របតាមសេចក្តីត្រូវការជាក់ស្តែង និងត្រឹមត្រូវតាមបច្ចេកទេសគណនេយ្យ។ ទន្ទឹមនឹងនេះ ត្រូវបែងចែកការទទួលខុសត្រូវលើការរៀបចំសំណុំឯកសារទូទាត់បេសកកម្ម និងការចំណាយផ្សេងៗឱ្យបានទាន់ពេលវេលា ដើម្បីធានាបាននូវតម្លាភាព និងសង្គតិភាពក្នុងការគ្រប់គ្រងថវិកា។
ជាលទ្ធផលនៃកិច្ចប្រជុំបានឯកភាពជាគោលការណ៍លើការបែងចែកភារកិច្ចថ្មី ដោយផ្អែកលើសមត្ថភាព និងជំនាញជាក់ស្តែងរបស់មន្ត្រីម្នាក់ៗ ដើម្បីធានាឱ្យបាននូវសង្គតិភាពក្នុងការងារ និងជំរុញឱ្យវិទ្យាស្ថានគរុកោសល្យបាត់ដំបង កាន់តែមានប្រសិទ្ធភាពខ្ពស់ក្នុងការបំពេញបេសកកម្មរបស់ខ្លួន។

បាត់ដំបង | ១៨ កុម្ភៈ ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia