កិច្ចប្រជុំពិភាក្សាលើកិច្ចសហប្រតិបត្តិការលើការលើកកម្ពស់កម្រិតគុណវុឌ្ឍិសិក្សារបស់បុគ្គលិកអប់រំរបស់វិទ្យាស្ថានគរុកោសល្យបាត់ដំបងសម្រាប់ថ្នាក់បរិញ្ញាបត្រជាន់ខ្ពស់ និងបណ្ឌិត នៅប្រទេសកូរ៉េខាងត្បូង

នារសៀលថ្ងៃទី០២ ខែកុម្ភៈ ឆ្នាំ២០២៥នេះ តបតាមការអញ្ជើញរបស់សាកលវិទ្យាល័យ Jungwon ប្រទេសកូរ៉េខាងត្បូង វិទ្យាស្ថានគរុកោសល្យបាត់ដំបងបានចូលរួមកិច្ចប្រជុំតាមរយៈអនឡាញ ដើម្បីពិភាក្សាលើកិច្ចសហប្រតិបត្តិការស្ដីពី «ការលើកកម្ពស់កម្រិតគុណវុឌ្ឍិសិក្សារបស់បុគ្គលិកអប់រំរបស់វិទ្យាស្ថានគរុកោសល្យបាត់ដំបងសម្រាប់ថ្នាក់បរិញ្ញាបត្រជាន់ខ្ពស់ និងបណ្ឌិត នៅប្រទេសកូរ៉េខាងត្បូង» ក្រោមវត្តមាន ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងលោកសាស្ត្រាចារ្យបណ្ឌិត Yonghwan Bang អនុប្រធានផ្នែកទំនាក់ទំនងសកលនៃសាកលវិទ្យាល័យ Jungwon ប្រទេសកូរ៉េខាងត្បូង ព្រមទាំងមានការអញ្ជើញចូលរួមពីសំណាក់លោកព្រឺទ្ធបុរស ព្រឹទ្ធបុរសរងរបស់មហាវិទ្យាល័យអប់រំវិទ្យាសាស្ត្រនៃវិទ្យាស្ថានគរុកោសល្យបាត់ដំបង។
ក្នុងដំណើរការនៃកិច្ចប្រជុំ លោកបណ្ឌិត Yonghwan Bang បានបង្ហាញពីឆន្ទៈរបស់សាកលវិទ្យាល័យ Jungwon ក្នុងនាមជាគ្រឹះស្ថានឧត្តមសិក្សាឈានមុខមួយនៅប្រទេសកូរ៉េខាងត្បូង ដើម្បីត្រៀមខ្លួនទទួលយកបុគ្គលិកអប់រំពីវិទ្យាស្ថានគរុកោសល្យបាត់ដំបង ទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត។ កិច្ចសហប្រតិបត្តិការនេះនឹងផ្ដោតសំខាន់លើការផ្ដល់នូវបរិយាកាសសិក្សាដ៏រឹងមាំ ការស្រាវជ្រាវកម្រិតខ្ពស់ និងការផ្លាស់ប្តូរបទពិសោធន៍សិក្សារវាងប្រទេសទាំងពីរ ដើម្បីឆ្លើយតបទៅនឹងតម្រូវការជាក់ស្ដែងក្នុងការអភិវឌ្ឍធនធានមនុស្សនៅវិទ្យាស្ថានគរុកោសល្យបាត់ដំបង ឱ្យកាន់តែមានសមត្ថភាពខ្ពស់។
ជាកិច្ចសន្និដ្ឋាន ឯកឧត្តមបណ្ឌិត ជា រដ្ឋា បានសម្តែងនូវការស្វាគមន៍យ៉ាងកក់ក្តៅចំពោះគំនិតផ្តួចផ្តើមនេះ និងបានពិភាក្សាលើការរៀបចំយន្តការការងារបន្ត ដើម្បីឈានទៅរកការបង្កើតភាពជាដៃគូជាផ្លូវការ។ ឯកឧត្តមបានបញ្ជាក់ថា ការលើកកម្ពស់កម្រិតសញ្ញាបត្ររបស់បុគ្គលិកអប់រំសម្រាប់ថ្នាក់បរិញ្ញាបត្រជាន់ខ្ពស់ និងបណ្ឌិត គឺជាគោលដៅយុទ្ធសាស្ត្រអាទិភាពរបស់វិទ្យាស្ថាន ក្នុងគោលបំណងពង្រឹងគុណភាពអប់រំ និងការបណ្ដុះបណ្ដាលគ្រូឱ្យស្របតាមស្តង់ដារតំបន់ និងសកលលោក។

បាត់ដំបង | ២ កុម្ភៈ ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia