ពិធីចុះអនុស្សរណៈនៃការយោគយល់គ្នា (MOU) រវាងវិទ្យាស្ថានគរុកោសល្យបាត់ដំបង និងពុទ្ធិកសាកលវិទ្យាល័យព្រះសីហនុរាជ

នារសៀលថ្ងៃអង្គារ ១១រោច ខែពិសាខ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១២ ខែឧសភា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំពិធីចុះអនុស្សរណៈនៃការយោគយល់គ្នា (MOU) ជាមួយពុទ្ធិកសាកលវិទ្យាល័យព្រះសីហនុរាជ ក្រោមព្រះអធិបតីភាពដ៏ខ្ពង់ខ្ពស់ សម្តេចព្រះមហាអរិយវង្ស បណ្ឌិត យ៉ន សេង យៀត ព្រះសាកលវិទ្យាធិការពុទ្ធិកសាកលវិទ្យាល័យព្រះសីហនុរាជ និងមានការនិមន្តអញ្ជើញចូលរួមពី ព្រះបាលិកោវិទ បណ្ឌិត ឌិត វីរៈ ព្រះសាកលវិទ្យាធិការរង ព្រះយសបញ្ញាបណ្ឌិត វី សុវិជ្ជា ព្រះប្រធានសាខាពុទ្ធិកសាកលវិទ្យាល័យព្រះសីហនុរាជសាខាខេត្តបាត់ដំបង និងការអញ្ជើញចូលរួមពី ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង ព្រមទាំងគណៈគ្រប់គ្រងទាំងអស់នៃវិទ្យាស្ថានគរុកោសល្យបាត់ដំបង ព្រមទាំងព្រះគុណម្ចាស់ជាច្រើនព្រះអង្គនិមន្តពីសាលាគណខេត្តបាត់ដំបង និងពុទ្ធិកសាកលវិទ្យាល័យសាខាខេត្តបាត់ដំបង ដើម្បីសក្ខីភាពនៃការកសាងភាពជាដៃគូលើកដំបូងរវាងពុទ្ធិកសាកលវិទ្យាល័យព្រះសីហនុរាជ និងគ្រឹះស្ថានបណ្តុះបណ្តាលគ្រូបង្រៀនកម្ពុជា។ ការចុះអនុស្សរណៈនៃការយោគយល់នេះមានគោលបំណងសំខាន់ៗរួមមាន៖ (១) ការពង្រឹងវិជ្ជាជីវៈ៖ លើកកម្ពស់សមត្ថភាពគ្រូឧទ្ទេស បុគ្គលិក គរុនិស្សិត និងសមណៈនិស្សិត តាមរយៈការសិក្សា និងសកម្មភាពបច្ចេកទេសរួមគ្នា (២) ការចែករំលែកធម្មទាន និងចំណេះដឹង៖ ជំរុញការប្រគេន និងចែករំលែកនូវធនធានអប់រំ កិច្ចស្រាវជ្រាវ ដើម្បីជាប្រយោជន៍រួមនៃស្ថាប័នទាំងពីរ (៣) នវានុវត្តន៍អប់រំ៖ គាំទ្រការប្រើប្រាស់វិធីសាស្ត្របង្រៀនបែបទំនើប និងបច្ចេកវិទ្យា ព្រមទាំងសម្របសម្រួលការនិមន្ត និងអញ្ជើញចូលរួមក្នុងសិក្ខាសាលា ឬសន្និសីទវិទ្យាសាស្ត្រនានា (៤) ការអភិវឌ្ឍធនធានមនុស្ស៖ ចូលរួមចំណែកអភិវឌ្ឍធនធានមនុស្សឱ្យមានគុណភាពខ្ពស់ ស្របតាមតម្រូវការជាក់ស្តែងរបស់ជាតិ និងតំបន់ (៥) កិច្ចសហការស្រាវជ្រាវ៖ សហការអភិវឌ្ឍគម្រោងស្រាវជ្រាវ ការច្នៃប្រតិដ្ឋ និងការផ្លាស់ប្តូរគ្រូ-និស្សិត ដើម្បីបង្កើនបទពិសោធន៍ជាក់ស្តែង។ តាមនាមឱ្យវិទ្យាស្ថានគរុកោសល្យបាត់ដំបង ឯកឧត្តមបណ្ឌិត ជា រដ្ឋា បានគោរពអរព្រះគុណ សម្តេចព្រះមហាអរិយវង្ស បណ្ឌិត យ៉ន សេង យៀត ដែលសម្តេចបានផ្តល់ព្រះវត្តមានដ៏ថ្លៃថ្លាឧត្តុង្គឧត្តមនៅក្នុងវិទ្យាស្ថានគរុកោសល្យបាត់ដំបង សម្រាប់កម្មវិធីចុះអនុស្សរណៈនៃការយោគយល់គ្នា (MOU) ដែលសម្តែងពីទឹកព្រះទ័យយកចិត្តទុកដាក់របស់សម្តេចក្នុងការសហប្រតិបត្តិការពិសេសការធ្វើឱ្យប្រសើរឡើងនូវការអប់រំគ្រូបង្រៀនតាមរយៈការចូលរួមចំណែកពីព្រះពុទ្ធសាសនា។ ឯកឧត្តមបណ្ឌិត ក៏បានលើកឡើងពីសារសំខាន់នៃព្រះពុទ្ធសាសនាក្នុងការអប់រំទូន្មាន ពិសេសការអប់រំសីលធម៌ ចរិយាធម៌ និងគុណធម៌ក្នុងសង្គម ហើយគ្រូបង្រៀនជាវិស្វករព្រលឹង ជាភ្នាក់ងារអភិវឌ្ឍចំណេះ កសាងអនាគតប្រទេសជាតិខ្វះមិនបាន ដូច្នេះកិច្ចប្រតិបត្តិថ្ងៃនេះ មិនត្រឹមតែជាកិច្ចសហប្រតិបត្តិការដែលនាំមកនូវប្រយោជន៍សម្រាប់វិទ្យាស្ថាន និងពុទ្ធិកសាកលវិទ្យាល័យព្រះសីហនុរាជទេ តែនឹងផ្តល់ផលជះវិជ្ជមានជាច្រើនដល់លោកគ្រូ-អ្នកគ្រូ គរុនិស្សិត និងប្អូនៗសិស្សានុសិស្សជាច្រើន។ សម្តេចព្រះមហាអរិយវង្ស មានព្រះទ័យរីករាយដែលបានមកទតផ្ទាល់បន្ទាប់ពីរយៈពេល ៣៥ឆ្នាំ ដែលសម្តេចធ្លាប់ដើរកាត់សាលាគរុកោសល្យបាត់ដំបងកាលពីឆ្នាំ១៩៩១។ សម្តេចសម្តែងនូវការសាទរជាមួយក្រសួងអប់រំ យុវជន និងកីឡា ក៏ដូចជាវិទ្យាស្ថានគរុកោសល្យបាត់ដំបង ដែលបានកែលម្អ និងកែទម្រង់ជាច្រើនទាំងហេដ្ឋារចនាសម្ព័ន្ធរូបវន្ត និងបច្ចេកទេសដែលធ្វើឱ្យគ្រឹះស្ថានបណ្តុះបណ្តាលគ្រូបង្រៀនមួយមានភាពទាក់ទាញ និងស្តង់ដារខ្ពស់។ សម្តេចមានសង្ឃដីកាបន្តទៀតថា ក្នុងនាមជាព្រះសាកលវិទ្យាធិការពុទ្ធិកសាកលវិទ្យាល័យព្រះសីហនុរាជ សម្តេចនឹងបន្តខិតខំប្រឹងប្រែងចែករំលែកចំណេះដឹង ផ្សព្វផ្សាយពុទ្ធសាសនាឱ្យបានទូលំទូលាយ ពិសេសចូលរួមជាមួយរាជរដ្ឋាភិបាលក្នុងការពង្រឹងចំណេះដឹង ជំនាញ សីលធម៌ វិន័យ ក្នុងសង្គមកម្ពុជា។ សម្តេចព្រះមហាអរិយវង្សបណ្ឌិត បានថ្លែងអំណរគុណដល់គណៈគ្រប់គ្រងវិទ្យាស្ថាន និងបាននិមន្តទស្សនកិច្ចវិទ្យាស្ថាន មុននឹងដំណើរនិមន្តនិវត្តន៍ទៅរាជធានីភ្នំពេញវិញ។ ឯកឧត្តមបណ្ឌិតនាយកវិទ្យាស្ថាន គោរពនិមន្តសម្តេចក្នុងការផ្តល់បាឋកថា និងពុទ្ធឱវាទដល់បុគ្គលិកអប់រំ គរុនិស្សិតនៃវិទ្យាស្ថាននាពេលខាងមុខ និងថ្វាយព្រះពរ សម្តេច ព្រះគុណម្ចាស់គ្រប់ព្រះអង្គ សូមនិមន្តត្រឡប់ទៅភ្នំពេញប្រកបដោយសុខសុវត្ថិភាព។

បាត់ដំបង | ១២ ឧសភា ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia