កម្មវិធី បើក វេទិកាអន្តរជាតិស្ដីពីការអប់រំគ្រូបង្រៀនសតវត្សរ៍ទី២១ លើកទី១ ក្រោមប្រធានបទ៖ «ការអប់រំគ្រូបង្រៀនតាមគន្លងអប់រំថ្មី៖ ពីគ្រឹះអំណាន និងគណិតវិទ្យាដំបូង ទៅនវានុវត្តន៍ស្ទែម ប្រកបដោយ បរិយាបន្ន និងភាពធន់»

នាថ្ងៃអាទិត្យ ៧កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៨ ខែតុលា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំពិធីបើក «វេទិកាអន្តរជាតិស្ដីពីការអប់រំគ្រូបង្រៀនសតវត្សរ៍ទី២១ លើកទី១» ក្រោមប្រធានបទ «ការអប់រំគ្រូបង្រៀនតាមគន្លងអប់រំថ្មី៖ ពីគ្រឹះអំណាន និងគណិតវិទ្យាដំបូង ទៅនវានុវត្តន៍ស្ទែម ប្រកបដោយបរិយាបន្ន និងភាពធន់» ក្រោមអធិបតីភាពដ៏ខ្ពង់ខ្ពស់របស់ ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងមានការអញ្ជើញចូលរួមពីសំណាក់ លោក Manoj Pandey ប្រធានប្រចាំប្រទេស នៃអង្គការ ProPeace Cambodia លោក អ៊ូ ប្រុស អ្នកគ្រប់គ្រងកម្មវិធីប្រចាំប្រទេសស្ដីទី នៃអង្គការ VVOB Cambodia តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA Cambodia) លោក លោកស្រី ជា​នាយក នាយិការង ព្រឹទ្ធបុរស ព្រឹទ្ធបុរសរង និងប្រធានដេប៉ាតឺម៉ង់ លោកគ្រូ អ្នកគ្រូឧទ្ទេស បុគ្គលិកអប់រំ លោកគ្រូ អ្នកគ្រូផ្នែកកិច្ចព្រមព្រៀងការងារ ព្រមទាំងគរុនិស្សិតទាំងអស់នៃវិទ្យាស្ថានគរុកោសល្យបាត់ដំបង។
ការរៀបចំ «វេទិកាអន្តរជាតិស្ដីពីការអប់រំគ្រូបង្រៀនសតវត្សរ៍ទី២១ លើកទី១» (IFTEC) នាឱកាសនេះ គឺជាព្រឹត្តិការណ៍អប់រំដ៏មានសារៈសំខាន់មួយ ដែលបានប្រមូលផ្តុំអ្នកស្រាវជ្រាវ និងអ្នកជំនាញការអប់រំទាំងជាតិ និងអន្តរជាតិ ដើម្បីធ្វើការចែករំលែកបទពិសោធន៍ ការស្រាវជ្រាវប្រតិបត្តិ និងការអនុវត្តវិធីសាស្ត្របង្រៀនថ្មីៗ ក្នុងការផ្លាស់ប្ដូររបៀបបង្រៀនរបស់គ្រូ និងរបៀបរៀនរបស់សិស្ស សំដៅលើកកម្ពស់លទ្ធផលសិក្សាឱ្យកាន់តែប្រសើរឡើង ឆ្លើយតបទៅនឹងស្តង់ដាតំបន់ និងពិភពលោក។
ទន្ទឹមនឹងនេះ នៅក្នុងព្រឹត្តិការណ៍អមក៏មានការរៀបចំ «ពិព័រណ៍ស្ទែម (STEM Exhibition)» ក្នុងគោលបំណងបណ្តុះស្មារតីស្រឡាញ់វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដល់សិស្ស និស្សិត គរុនិស្សិត និងយុវជន ព្រមទាំងលើកកម្ពស់ការគិតបែបច្នៃប្រឌិត ការដោះស្រាយបញ្ហាតាមបែបវិទ្យាសាស្ត្រ និងបង្កើនជំនាញទំនាក់ទំនង និងការធ្វើការជាក្រុម តាមរយៈការអនុវត្តទ្រឹស្តីចេញពីថ្នាក់រៀនមកបង្កើតជាគម្រោងជាក់ស្តែង។ លើសពីនេះ ពិព័រណ៍ស្ទែមនេះក៏បានផ្សារភ្ជាប់ការអប់រំទៅនឹងទីផ្សារការងារ ដោយបង្កើតឱ្យមានជំនួបរវាងអ្នកសិក្សា គ្រូបង្រៀន អ្នកជំនាញ និងក្រុមហ៊ុនឯកជន ដើម្បីជំរុញការបង្កើតថ្មី និងការច្នៃប្រឌិតដំណោះស្រាយសម្រាប់សង្គម។
ជាមួយគ្នានេះដែរ ការរៀបចំ «ពិព័រណ៍សៀវភៅ (Book Fair)» ក៏ត្រូវបានបង្កើតឡើងដើម្បីតភ្ជាប់ទំនាក់ទំនងរវាងអ្នកអាន ជាមួយអ្នកនិពន្ធ គ្រឹះស្ថានបោះពុម្ពផ្សាយ និងអ្នកផ្គត់ផ្គង់សៀវភៅ ក្នុងការលើកកម្ពស់វប្បធម៌នៃការអាន ពង្រឹងទម្លាប់សិក្សាពេញមួយជីវិត ជំរុញការស្រាវជ្រាវ ការតែងនិពន្ធ និងលើកទឹកចិត្តដល់អ្នកនិពន្ធក្នុងការកសាងមរតកឯកសារសម្រាប់មនុស្សជំនាន់ក្រោយផងដែរ។
នៅក្នុងឱកាសដ៏ថ្លៃថ្លានេះដែរ ឯកឧត្ដមបណ្ឌិត ជា រដ្ឋា បានគូសបញ្ជាក់អំពីការប្តេជ្ញាចិត្តយ៉ាងមុតមាំថា វិទ្យាស្ថាននឹងបន្តប្រែក្លាយខ្លួនឱ្យទៅជា «មជ្ឈមណ្ឌលឧត្តមភាពនៃការបណ្តុះបណ្តាលគ្រូបង្រៀននាសតវត្សទី២១» ដោយឈរលើមូលដ្ឋាននៃការស្រាវជ្រាវ នវានុវត្តន៍បច្ចេកវិទ្យាឌីជីថល និងការអនុវត្តវិធីសាស្ត្របង្រៀនថ្មីៗ ដើម្បីឆ្លើយតបទៅនឹងគោលនយោបាយ និងចក្ខុវិស័យរបស់ក្រសួងអប់រំ យុវជន និងកីឡា។ ឯកឧត្ដមបណ្ឌិតក៏បានបន្ថែមថា ភាពជោគជ័យនៃកម្មវិធីនាថ្ងៃនេះ ក៏ដូចជាដំណើរការអភិវឌ្ឍរីកចម្រើនរបស់វិទ្យាស្ថាន គឺមិនអាចកាត់ផ្តាច់ពីកិច្ចសហប្រតិបត្តិការ និងភាពជាដៃគូរវាងវិទ្យាស្ថាន និងដៃគូអភិវឌ្ឍន៍ជាតិ-អន្តរជាតិបានឡើយ។
ជាកិច្ចបញ្ចប់ ឯកឧត្ដមបណ្ឌិតបានថ្លែងអំណរគុណយ៉ាងជ្រាលជ្រៅជូនចំពោះ ក្រសួងអប់រំ យុវជន និងកីឡា អង្គការ ProPeace Cambodia និងអង្គការ VVOB ប្រចាំកម្ពុជា ដែលបានសហការរៀបចំកម្មវិធីនេះឡើង ព្រមទាំងថ្លែងអំណរគុណជាពិសេសជូនចំពោះ ទីភ្នាក់ងារសហប្រតិបត្តិការអន្តរជាតិជប៉ុន (JICA), ក្រុមហ៊ុន Vattanac Brewery ដែលជាអ្នកឧបត្ថម្ភធំកម្រិត Platinum, សាលាអន្តរជាតិ យូ អេស អេ និងសាលាឌូវីអន្តរជាតិ ដែលបានឧបត្ថម្ភកម្រិត Gold, ធនាគារកាណាឌីយ៉ា ដែលបានឧបត្ថម្ភកម្រិត Silver ព្រមទាំងដៃគូអង្គការ សាកលវិទ្យាល័យនានាក្នុងខេត្តបាត់ដំបង និងគ្រឹះស្ថានធនាគារជាច្រើនទៀត ដែលបានចូលរួមឧបត្ថម្ភ និងគាំទ្រយ៉ាងពេញទំហឹងដល់កម្មវិធីទាំងមូល។

១៨ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia