កម្មវិធីជំនួបសំណេះសំណាលអាណាព្យាបាលគរុនិស្សិតប្រចាំឆ្នាំ នៃវិទ្យាស្ថានគរុកោសល្យបាត់ដំបង

នាព្រឹកថ្ងៃចន្ទ ៣រោច ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣១ ខែសីហា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំ «កម្មវិធីជំនួបសំណេះសំណាលអាណាព្យាបាលគរុនិស្សិត ១២+៤ ជំនាន់ទី៤ ប្រចាំឆ្នាំ» ក្រោមអធិបតីភាព ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង នៅសាលពហុបំណងសាគូរ៉ា ដោយមានការចូលរួមពីសំណាក់នាយក-នាយិការង គណៈគ្រប់គ្រង លោកគ្រូ-អ្នកគ្រូឧទ្ទេស បុគ្គលិកអប់រំ អាណាព្យាបាល និងគរុនិស្សិតសរុបចំនួន ១៨៥ នាក់។
ក្នុងឱកាសនោះ កម្មវិធីបានចាប់ផ្តើមដោយការស្វាគមន៍ និងបង្ហាញពីគោលបំណងដោយ លោកបណ្ឌិត ហ៊ត ស៊ីនួន នាយករងវិទ្យាស្ថានគរុកោសល្យបាត់ដំបង។ បន្ទាប់មក លោក យស ដាវុធ ប្រធានស្ដីទីការិយាល័យសិក្សា និងវិក្រឹតការ បានឡើងរាយការណ៍ពីលទ្ធផលសិក្សាឆ្នាំ២០២៥-២០២៦ ព្រមទាំងផែនការបន្ត និងអមដោយបទបង្ហាញស្ដីពីការចុះតាមដានគរុនិស្សិត ដោយលោកស្រី ជា ផាណែត អនុប្រធានការិយាល័យធានាគុណភាពផ្ទៃក្នុង។
ថ្លែងក្នុងកម្មវិធី ឯកឧត្ដមបណ្ឌិត នាយកវិទ្យាស្ថាន បានថ្លែងអំណរគុណយ៉ាងជ្រាលជ្រៅចំពោះវត្តមានរបស់អាណាព្យាបាលទាំងអស់ និងបានគូសរំលេចពីមោទនភាពដែល វគប ទទួលបានស្តង់ដាសាលាគរុកោសល្យគំរូ ព្រមទាំងពានរង្វាន់ជាច្រើន និងការទទួលស្គាល់គុណភាពស្ថាប័នពី ACC ដែលជាផ្លែផ្កាកើតចេញពីកម្លាំងសាមគ្គីរបស់មហាគ្រួសារ វគប និងការឧបត្ថម្ភគាំទ្រពីក្រសួងអប់រំ យុវជន និងកីឡា។
ជាមួយគ្នានេះ ឯកឧត្ដមក៏បានលើកឡើងដោយស្មោះត្រង់អំពីបញ្ហាប្រឈមមួយចំនួនពាក់ព័ន្ធនឹងលទ្ធផលសិក្សា និងវិន័យរបស់គរុនិស្សិត ដោយបានស្នើសុំកិច្ចសហការយ៉ាងទទូចពីអាណាព្យាបាលក្នុងការជួយដាស់តឿនកូនៗ ហើយជាពិសេស «មិនលើកទឹកចិត្តឱ្យគរុនិស្សិតធ្វើការងារបន្ថែមដើម្បីប្រាក់ចំណូលឡើយ» ដោយសារប្រាក់អាហារូបករណ៍ត្រូវបានផ្តល់ជូនទៀងទាត់រួចហើយ ដើម្បីទុកពេលឱ្យពួកគាត់ផ្តោតលើការសិក្សាឱ្យបានពេញលេញ ជៀសវាងមានវិប្បដិសារីនៅថ្ងៃក្រោយ។
ក្នុងឱកាសដ៏មានអត្ថន័យនេះដែរ តំណាងអាណាព្យាបាលគរុនិស្សិត ក៏បានថ្លែងអំណរគុណយ៉ាងជ្រាលជ្រៅជូនចំពោះថ្នាក់ដឹកនាំ និងលោកគ្រូ-អ្នកគ្រូឧទ្ទេសនៃវិទ្យាស្ថាន ព្រមទាំងបានសម្តែងនូវការទទួលស្គាល់ និងជឿជាក់យ៉ាងមុតមាំលើគុណភាពនៃការបណ្តុះបណ្តាលរបស់វិទ្យាស្ថាន ដែលមិនត្រឹមតែផ្តល់នូវចំណេះវិជ្ជាយ៉ាងរឹងមាំប៉ុណ្ណោះទេ ប៉ុន្តែថែមទាំងបានអប់រំបណ្តុះបណ្តាលផ្នែកចរិយាធម៌ និងគុណធម៌ដ៏ល្អប្រពៃដល់គរុនិស្សិតគ្រប់រូបផងដែរ។
ជំនួបនេះបានបញ្ចប់ទៅដោយបរិយាកាសស្និទ្ធស្នាល និងការប្តេជ្ញាចិត្តរួមគ្នាក្នុងការបណ្តុះបណ្តាល «គ្រូបង្រៀនគំរូ» ដើម្បីអភិវឌ្ឍវិស័យអប់រំ និងកសាងសង្គមជាតិឱ្យរឹងមាំ។

៣១ សីហា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia