កិច្ចប្រជុំពិនិត្យលើពង្រាងកិច្ចព្រមព្រៀងសកម្មភាពរវាងវិទ្យាស្ថានគរុកោសល្យបាត់ដំបង និងវិទ្យាល័យជំនាន់ថ្មីទាំងបី

នាព្រឹកថ្ងៃទី១៧ ខែមីនា ឆ្នាំ២០២៦ ថ្នាក់ដឹកនាំនៃក្រសួងអប់រំ យុវជន និងកីឡា រួមជាមួយវិទ្យាស្ថានគរុកោសល្យបាត់ដំបង និងភាគីពាក់ព័ន្ធ បានរៀបចំកិច្ចប្រជុំតាមប្រព័ន្ធអនឡាញ (Zoom Meeting) ដើម្បីពិនិត្យ និងពិភាក្សាលើ ពង្រាងកិច្ចព្រមព្រៀងសកម្មភាពរវាងវិទ្យាស្ថានគរុកោសល្យបាត់ដំបង និងវិទ្យាល័យជំនាន់ថ្មីទាំងបី ក្នុងគោលបំណងលើកកម្ពស់ការអនុវត្តវិធីសាស្ត្របង្រៀនសតវត្សទី២១ និងវិធីសាស្ត្រសាលារៀនជំនាន់ថ្មី ដើម្បីអភិវឌ្ឍ និងកែលម្អលទ្ធផលសិក្សារបស់សិស្សឱ្យកាន់តែប្រសើរឡើង។ កិច្ចប្រជុំនេះរៀបចំឡើង ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឡោ ឆវណ្ណា អនុរដ្ឋលេខាធិការ និង ឯកឧត្តម ទេព ភិយ្យោរិទ្ធ អគ្គលេខាធិការនៃអគ្គលេខាធិការដ្ឋាន ព្រមទាំងមានការអញ្ជើញចូលរួមពីតំណាងអគ្គនាយកដ្ឋានបណ្តុះបណ្តាល អង្គការខេប (KAPE) នាយកដ្ឋានធនធានមនុស្ស និងគណៈគ្រប់គ្រងនៃស្ថាប័នទាំងបួន។
ក្នុងកិច្ចពិភាក្សានេះ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានធ្វើបទបង្ហាញលើ ពង្រាងផែនការសកម្មភាពដែលផ្តោតសំខាន់លើការអភិវឌ្ឍសមត្ថភាពបុគ្គលិកអប់រំ និងគរុនិស្សិត ដែល ផែនការសកម្មភាពនេះបានកំណត់យកសសរស្តម្ភចំនួន ៥ ជាចំណុចស្នូល រួមមាន៖ ១. ការអនុវត្តវិធីសាស្ត្របង្រៀនសតវត្សទី២១, ២. ការពង្រឹងប្រព័ន្ធបច្ចេកវិទ្យាអប់រំ (LMS & Digital Education), ៣. ការជំរុញការអប់រំ STEM តាមរយៈការពិសោធន៍ជាក់ស្តែង, ៤. ការធ្វើស្រាវជ្រាវប្រតិបត្តិ និង ៥. ការត្រៀមលក្ខណៈវាស់វែងសមត្ថភាពសិស្សតាមស្តង់ដារតេស្ត PISA។
ជាលទ្ធផលនៃកិច្ចប្រជុំ ឯកឧត្តម ទេព ភិយ្យោរិទ្ធ បានផ្តល់អនុសាសន៍ឱ្យអង្គភាពទាំង៤ បន្តកិច្ចសហការយ៉ាងជិតស្និទ្ធក្នុងការរៀបចំផែនការប្រតិបត្តិឱ្យបានជាក់លាក់បន្ថែមទៀត ជាពិសេសការពិនិត្យលើលទ្ធភាពគាំទ្របច្ចេកទេសពីអង្គការខេប។ ឯកឧត្តមបានគូសបញ្ជាក់ថា កិច្ចព្រមព្រៀងសកម្មភាពនេះ មិនត្រឹមតែជាការឆ្លើយតបទៅនឹងការវិវត្តនៃវិស័យអប់រំឌីជីថលប៉ុណ្ណោះទេ ប៉ុន្តែវាក៏ជាគ្រឹះយ៉ាងរឹងមាំក្នុងការកសាងសមត្ថភាពគ្រូបង្រៀនកម្ពុជា ឱ្យមានសក្តានុពលពេញលេញក្នុងការផ្ទេរចំណេះដឹងដល់សិស្សានុសិស្សប្រកបដោយប្រសិទ្ធភាព និងនិរន្តរភាព។

បាត់ដំបង | ១៧ មីនា ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia