កម្មវិធីរំឭកគុណគ្រូ «អបអរសាទរទិវាគ្រូបង្រៀន ៥ តុលា ២០២៦» នៅវិទ្យាស្ថានគរុកោសល្យបាត់ដំបង

នាព្រឹកថ្ងៃចន្ទ ៩រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៥ ខែតុលា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំ «កម្មវិធីរំឭកគុណគ្រូ ដើម្បីអបអរសាទរទិវាគ្រូបង្រៀន ៥ តុលា» នៅសាលពហុបំណងសាគូរ៉ា នៃវិទ្យាស្ថានគរុកោសល្យបាត់ដំបង ក្រោមអធិបតីភាព លោកបណ្ឌិត ហ៊ត ស៊ីនួន នាយករងវិទ្យាស្ថានគរុកោសល្យបាត់ដំបង តំណាង ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង។ កម្មវិធីនេះក៏មានការអញ្ជើញចូលរួមពីសំណាក់ លោកព្រឹទ្ធបុរស លោក-លោកស្រីព្រឹទ្ធបុរសរង លោក-លោកស្រីប្រធានស្ដីទីការិយាល័យ លោក-លោកស្រីប្រធានដេប៉ាតឺម៉ង់ លោកគ្រូ អ្នកគ្រូឧទ្ទេស បុគ្គលិកអប់រំ និងគរុនិស្សិតនៃវិទ្យាស្ថានគរុកោសល្យបាត់ដំបងទាំងអស់ផងដែរ។
ការរៀបចំកម្មវិធីនេះឡើងដើម្បីរំឭក និងសម្តែងនូវកតញ្ញូកតវេទិតាធម៌ចំពោះគុណូបការៈដ៏ថ្លៃថ្លារបស់លោកគ្រូ អ្នកគ្រូ ដែលបានខិតខំប្រឹងប្រែងអប់រំ បណ្ដុះបណ្ដាល និងទូន្មានប្រៀនប្រដៅគរុនិស្សិតឱ្យមានចំណេះដឹង សមត្ថភាព និងជោគជ័យដូចពេលបច្ចុប្បន្ន ព្រមទាំងដើម្បីអបអរសាទរទិវាគ្រូបង្រៀន ៥ តុលា។
នៅក្នុងឱកាសនោះ គរុនិស្សិត ពៅ ម៉ារ៉ា និងគរុនិស្សិត ពក ម៉ារី បានឡើងធ្វើសេចក្ដីរាយការណ៍ជូនអង្គពិធីអំពីប្រវត្តិនៃការរៀបចំទិវាគ្រូបង្រៀន ៥ តុលា។ បន្ទាប់មក មានការសូត្រកំណាព្យ «គុណគ្រូបង្រៀន» យ៉ាងពីរោះរណ្តំដែលនិពន្ធដោយគរុនិស្សិត រោត សុភាន និងសូត្រដោយគរុនិស្សិត ឈឿត អេន ព្រមទាំងការឡើងថ្លែងការប្ដេជ្ញាចិត្ត និងសម្តែងចំណាប់អារម្មណ៍យ៉ាងជ្រាលជ្រៅចំពោះកម្មវិធីពីតំណាងគរុនិស្សិត លោក អ៊ុន ស៊ុនហេង។ ជាមួយគ្នានេះ គរុនិស្សិត ទូត ស្រីនុត បានឡើងបង្ហាញចំណាប់អារម្មណ៍ជាភាសាអង់គ្លេស ដែលស្តែងពីការផ្លាស់ប្ដូរបទពិសោធន៍ជាមួយគ្រូបរទេស និងគរុនិស្សិត ហល់ សុខលាង បានបង្ហាញចំណាប់អារម្មណ៍ជាភាសាបារាំង ឆ្លុះបញ្ចាំងពីសកម្មភាពក្លឹបសិក្សាភាសាបារាំងជារៀងរាល់ថ្ងៃអង្គារ និងថ្ងៃព្រហស្បតិ៍។ ក្នុងនោះដែរ អ្នកគ្រូ ឡាំ ប៊ុនមករា ក៏បានឡើងចែករំលែកចំណាប់អារម្មណ៍ និងផ្តល់នូវមតិទូន្មានយ៉ាងមានន័យទៅកាន់សិស្ស-គរុនិស្សិតទាំងអស់ផងដែរ។
ជាកិច្ចបញ្ចប់ លោកបណ្ឌិត ហ៊ត ស៊ីនួន នាយករងវិទ្យាស្ថាន បានសង្កត់ធ្ងន់អំពីគុណតម្លៃដ៏វិសេសវិសាល និងឥតគណនារបស់គ្រូបង្រៀន ក្នុងការកសាងធនធានមនុស្ស អភិវឌ្ឍសង្គមជាតិ និងជាពន្លឺបំភ្លឺផ្លូវដល់ជំនាន់ក្រោយ។ លើសពីនេះ លោកបណ្ឌិតក៏បានសម្តែងនូវការកោតសរសើរ និងវាយតម្លៃខ្ពស់ចំពោះគំនិតផ្តួចផ្តើមដ៏ប្រពៃក្នុងការបំផុសគំនិត និងរៀបចំកម្មវិធីនេះឡើងរបស់គណៈវគ្គនៃវិទ្យាស្ថានគរុកោសល្យបាត់ដំបង ដែលបានបង្កើតនូវព្រឹត្តិការណ៍ដ៏មានន័យ បង្កើនសាមគ្គីភាព និងស្តែងចេញនូវការដឹងគុណយ៉ាងពិតប្រាកដចំពោះលោកគ្រូ អ្នកគ្រូគ្រប់រូប។

០៥ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia