ការស្វាគមន៍ដំណើទស្សនកិច្ច និងពិធីចុះហត្ថលេខាលើអនុស្សរណៈយោគយល់ (MoU) រវាងវិទ្យាស្ថានគរុកោសល្យបាត់ដំបង និងមជ្ឈមណ្ឌលគរុកោសល្យភូមិភាគឦសាន ខេត្តស្ទឹងត្រែង

នាព្រឹកថ្ងៃទី៧ ខែសីហា ឆ្នាំ២០២៦ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានដឹកនាំគណៈគ្រប់គ្រងវិទ្យាស្ថាន ទទួលស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់ប្រតិភូមជ្ឈមណ្ឌលគរុកោសល្យភូមិភាគឦសានខេត្តស្ទឹងត្រែង ដែលដឹកនាំដោយលោក ស៊ើយ វង្សស៊ី នាយកមជ្ឈមណ្ឌលគរុកោសល្យភូមិភាគឦសានខេត្តស្ទឹងត្រែង ក្នុងគោលបំណងសិក្សាស្វែងយល់ពីការដឹកនាំនិងការអនុវត្តការអប់រំគ្រូបង្រៀន និងការដឹកនាំវិទ្យាស្ថានឆ្ពោះទៅជាមជ្ឈមណ្ឌលអប់រំគ្រូបង្រៀនសតវត្សទី២១ ប្រកបដោយឧត្តមភាព និង ចុះហត្ថលេខាលើអនុស្សរណៈយោគយល់ ដើម្បីគាំទ្រគ្នាទៅវិញទៅមក លើការលើកកម្ពស់គុណភាពបណ្តុះបណ្តាលគ្រូបង្រៀន ការអភិវឌ្ឍវិជ្ជាជីវៈជាប្រចាំ (CPD) និងការស្រាវជ្រាវអប់រំ។
ក្នុងឱកាសដ៏ពិសេសនេះ ឯកឧត្តមបណ្ឌិតនាយកវិទ្យាស្ថាន បានបង្ហាញចែករំលែកពីគោលដៅ និងបេសកកម្មនៃការដឹកនាំគ្រប់គ្រងគ្រឹះស្ថានអប់រំគ្រូ ជូនចំពោះគណៈប្រតិភូពីភូមិភាគឦសានដែលបានអញ្ជើញមកកាន់ទឹកដីភូមិភាគពាយព្យជាលើកដំបូងនេះ។ ស្របជាមួយគ្នានេះ លោកនាយកមជ្ឈមណ្ឌលគរុកោសល្យភូមិភាគ ក៏បានបង្ហាញពីសាវតា និងគោលបំណងនៃដំណើរទស្សនកិច្ចនិងការចុះអនុស្សរណៈយោគយល់នាថ្ងៃនេះផងដែរ។
បន្ទាប់ពីពិធីចុះហត្ថលេខាលើអនុស្សរណៈយោគយល់ គណៈគ្រប់គ្រងវិទ្យាស្ថាន បានធ្វើបទបង្ហាញចែករំលែកបទពិសោធន៍ ស្តីពី៖
១.ការត្រៀមខ្លួនដើម្បីប្រែក្លាយជាវិទ្យាស្ថានគរុកោសល្យបាត់ដំបង
២.កម្មវិធីអប់រំគ្រូបង្រៀនតាមប្រព័ន្ធ ១២+៤ និង បរិញ្ញា+១
៣.យន្តការក្នុងការទទួលស្គាល់គុណភាពអ្នកផ្តល់សេវា CPD
៤.ដំណើរឆ្ពោះទៅការប្រែប្រួល វិទ្យាស្ថានគរុកោសល្យបាត់ដំបង ជាមជ្ឈមណ្ឌលអប់រំគ្រូបង្រៀនសតវត្សទី២១ប្រកបដោយឧត្តមភាព។
បន្ទាប់ពីបទបង្ហាញចែករំលែក គណៈគ្រប់គ្រងវិទ្យាស្ថានបានអមដំណើរគណៈប្រតិភូទស្សនកិច្ចផ្ទាល់ជុំវិញហេដ្ឋារចនាសម្ព័ន្ធរូបវន្តរបស់វិទ្យាស្ថានដែលគាំទ្រលើការអប់រំគ្រូបង្រៀន។
វិទ្យាស្ថានជឿជាក់យ៉ាងមុតមាំថា ការចែករំលែក និងសហការគាំទ្រគ្នាទៅវិញទៅមករវាងគ្រួសារគ្រឹះស្ថានបណ្តុះបណ្តាលគ្រូ គឺជាការកសាងមូលដ្ឋានគ្រឹះអប់រំគ្រូបង្រៀន ដែលជាកម្លាំងស្នូលនៃការអប់រំដ៏សំខាន់សម្រាប់បច្ចុប្បន្ន និងអនាគត។

០៧ សីហា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia